Экс-шенеунікке алаяқтық бойынша айып тағылды

Ақмола облысында сот экс-сенатор, Солтүстік Қазақстан облысының бұрынғы әкімі Самат Ескендіровке қатысты алаяқтық жасады деген айыппен істі қарап жатыр. Бұл туралы KAZ.NUR.KZ хабарлайды.

Ақмола облыстық сотында хабарланғандай, іс Көкшетау қалалық сотында қаралып жатыр. Сот маусым айынан бері жалғасып жатыр, келесі отырыс 1 тамызға белгіленіп, жәбірленушілерден жауап алынады деп күтілуде.

Сотқа шақырылуға жататын адамдардың тізімінде 266 адам бар. Самат Ескендіровке Қылмыстық кодекстің 190-бабы 4-бөлігі 2-тармағы (Алаяқтық) бойынша айып тағылып отыр. Тергеу мәліметтері бойынша, ол алдау жолымен Бурабай ауданы Ақылбай ауылы тұрғындарының шартты жер үлестеріне құқығын иемденіп, екі немесе одан да көп тұлғалардың мүлкін заңсыз иемденіп, материалдық залал келтірген деген күдікке ілінген.

Сотталушыға қатысты тұрғылықты мекенжайынан ешқайда шықпау туралы қолхат түріндегі бұлтартпау шарасы таңдалды. Солтүстік Қазақстан облысы әкімдігінің ресми сайтындағы ақпаратқа сүйенсек, Самат Ескендіров 1966 жылы 24 маусымда Көкшетау (қазіргі Ақмола) облысы, Зеренді ауданы, Симферопольское ауылында дүниеге келген. Ол 2013-2014 жылдары Солтүстік Қазақстан облысының әкімі болды. 2011 жылдың қыркүйегінен 2013 жылдың қаңтарына дейін сенат депутаты болған.

Фото көрнекілік үшін интернеттен алынды.