Меккеде шырша құрылып, Дубайда от шашудың «атасы» болды
Қазақстандағы мұсылман қауымы 2024 жылғы желтоқсан айының соңғы апталарында әлдебір тренд жариялады ма, тапсырма алды ма, белгісіз, әйтеуір әлеуметтік желіде «жаңа жылды тойлама, анау — харам, мынау — харам» дейтін видеоларды қарша боратты.
Біздегі дінге сенгіштер шыршамен, жаңа жылдық дастарқанмен алысып жатқанда, Дубай, Абу-Даби, Катар сынды елдерде 2025 жаңа жылды қарсы алу — ең жоғары деңгейде тойланды.
Біздің уағызшылар «Ережеп айы басталды. 31 желтоқсаннан 1 қаңтарға қараған түні өйтейік, бүйтейік» деп жұртты барынша мерекені тойлаудан қашыртуға күш салып жатты. Ал Ислам діні шыққан топырақта жаңа жылдық от шашудың атасы болып жатты.
Төмендегі бірнеше видео бұл сөзімізге дәлел бола алады. Десек те, біздегі дінге сенуші кейбіреулердің өзін жұрттан ерекшелегісі, өзін жұрттан биік санап, дәп бір құдайға тым жақын екенін көрсеткісі келіп тұратын пасық ниетінің астарын аңғармау қиын емес-ақ.
Қазақстан Республикасының «Мерекелер туралы» заңында бекітілген мейрамды «тойлама» деуі арқылы Ата заңымызға қарсы шығып жатқан мұндай азаматтардың бұл әрекеті биліктің саясатына қарсылық таныту емес пе? Қалай ойлайсыз?
Әйтпесе, әлем ескі жылды шығарып салып, жаңа жылды қарсы алып жатыр. Мерекені тойлап жатқан бүкіл пенде мас болып, сойқан салып жатқан жоқ. Ішетін кісіге мереке сылтау емес те. Ал дін адамдары шыршадан шошып, думанды кештен жұртты қашыртуда. Сондағы айтар уәждері — ол күні арақ ішіліп, қылмыс көбейеді-мыс.
Әр мүсілім қасиетті санайтын Меккенің өзінде шырша құрылған соң, біздікілердің тірлігін қалай түсінбек керек? Күнә біткен бір шырша құруға байланып қалғандай, сонша тулағаны несі?
Бұл — әрине, сылтау ғой. Әйтпесе, діни бауырлас елдерде жаңа жылды қарсы алу былай тұрсын, хелоуинді дүркіретіп тойлатып жатқан жоқ па? Демек, біздегі дін адамдарының көксегені басқа нәрсе сияқты. Не болуы мүмкін, қалай ойлайсыз?
Дайындаған — Хақназар САДЫРХАН.
Фото көрнекілік үшін интернеттен алынды.
