Башар Асадты Ресей экстрадициялай ма?

Ресей Сирияның экс-президенті Башар Асадты ешкімге бермейтінін мәлімдеді. Бұл туралы Stan.kz ақпарат агенттігі Взгляд басылымына сілтеме жасап хабарлайды. 

Стратегиялар мен технологияларды талдау орталығының аға ғылыми қызметкері Юрий Ляминның сөзінше, Башар Асад Мәскеуде өмірінің соңына дейін тұрақтап қалады.

«Ресей халықаралық қылмыстық сотқа бағыну туралы хаттаманы ратификациялаған жоқ. Сондықтан Асадты тұтқындауға ордер берген болса да, Мәскеу оны экстрадицияламайды», – деді саясаттанушы.

Ляминнің айтуынша, АҚШ та, Еуроодақ та Башар Асадты жауапқа тарта алмайды. Сарапшы Украинаның бұрынғы президенті Виктор Янукович пен Орталық барлау басқармасының бұрынғы қызметкері Эдвард Сноуденнің Ресейде көп жылдар бойы тұрып жатқанын және ешбір шетелдік әділет органдары «оларға қол ұшын созбағанын» айтты.

«Асадты біздің елде құрметті қарттық күтіп тұр», – деді ол.

Ал Financial Times басылымы Башар Асадтың туыстары мен достары Мәскеуден 2013-2019 жылдар аралығында құны 40 миллион долларға (20 миллиард 416 миллион теңге) 19 пәтер сатып алғанын хабарлады.

Шетелдік БАҚ мәліметінше, 13 пәтер экс-президенттің ағасы Хафиз Махлуфтың бақылауындағы компанияларға тиесілі екені айтылған.

Асадтың немере ағасы Рами Махлуфтың әйелі де Ресей астанасында жылжымайтын мүлік сатып алған. Құжаттарға сәйкес оның атында екі пәтер бар.

Ал төрт жылжымайтын мүлік Асадтың немере ағалары Ихаб пен Ияд Махлуфқа тиесілі.

Сондай-ақ Сирияның бұрынғы президентінің тағы бір немере ағасы Махлубтың Мәскеу қаласына жақын жерде орналасқан үш бөлмелі пәтері бар.

Алдын ала болжам бойынша, мүлік 40 миллион долларға бағаланған. Мәмілелер жылжымайтын мүліктері ресми тіркелген оффшорлық компаниялардың көмегімен жүзеге асырылған.