Депутат Ирина Смирнованың мұғалімдердің біліміне қатысты айтқаны сынына байланысты танымал педагог Мира Барказатқызы өз пікірін білдірді деп жазады Democrat.kz.
Еске салып өтейік, күні кеше Ирина Смирнова "Мұғалімдердің жартысынан көбі өз пәнін білмейді" деп, аттестациядан өтпей қалған мұғалімдерді сын тезіне алған еді.
Депутаттың осы сөзіне қатысты Мира Барказатқызы:
"МҰҒАЛІМНІҢ БІЛІМІ ТӨМЕН,-депті депутат ханым. Әркім көргенін, білгенін айтады. “Білімі төмен” дейтіндей мұғалімнің білімін қалай сынады екен, сынақтың алгоритмі қандай болды екен?!
Алдын -ала не істеу керек екені дәл көрсетілген есептеу үрдісі жүрді ме екен?! Жоқ! “Мұғалімде білім жоқ” деген сыңаржақ қисынсыз пікір.
PIZA бойынша тексерілген мұғалім емес, оқушы дағдысы. Оқушы алған білімін пайдалану дағдысы PIZA халықаралық сынағында төмен шықты.
Осы сынақ бойынша оқушы білімі 2012 жылы жоғары болады да кейінгі жылы төмендейді. Ендеше, 2012 жылға дейінгі оқушыға берілген білім жүйелі болған ғой.
Ал PIZA бойынша нақты дерек мынандай:Қазақстанның деңгейі (2022 нәтижелері бойынша), 81 мемлекет арасынан Қазақстан 51-орында тұр:Математика: 47-орын (2018-ге қарағанда жақсарған).Оқу сауаттылығы (оқу): 61-орын.Ғылым: 49-орын (2018-ден жоғары нәтиже).Шамамен 2 % оқушылар — математикадан ең жоғары деңгейдегі қабілетке (5–6 деңгей) жеткен;OECD орташа — ~9 %.Ғылымнан 1 % — ең жоғары деңгейде (ал OECD орташа ~7 %).
Бұл оқушы дағдысының көрсеткіші. Оқушы дағдысын қалыптастыратын - мұғалім. Білім берілгенімен дағды берілмесе, осы уақытқа дейін үш жыл бойы себебі неге анықталмады?! Себебі -мұғалімнің білімі деп қүтыла салу жеңіл.
Мұғалімдерге “Нысаналы мектеп” деген атышулы Жобаның курсын оқытты. Жоба курсын мұғалімдер сабақ беріп жатып та оқыды, сабақтан кейін де оқыды. Соңында тест тапсырды.
Тест сұрақтары мен тест жауаптары сәйкес емес. Сюжет пен композицияны сұрап, жауапқа фабуланы берген, құрмалас сөйлемді сұрап, айқындауыш мүшелі жәй сөйлемді берген.
Осы тест сұрағында дұрыс жауап берсе 30,60% білім сапасын беріп, қате жауап берсе 100% болса, солай мұғалімді тексерсе, қайдан сапалы кадр шығады. Меніңше, бұл- қоғамдағы мұғалімнің беделін түсіріп, теріс пікір тудыру үшін жасалған жоба.
Жасаған да оқытқан да “Өрлеу” . Бұның солай екенін күллі мұғалім білді. Жобаның қате екенін айтқандар қудаланды. Қудаланғанның бірі -менмін! Бұл жүйесіздік!
Жүйесіз дүниемен мұғалімді сынап-мінемесін! Біліктілігі төмен мұғалімді ақылы оқу орындары шығарды, жалған диплом берді. Олардың ішінде де жанын салып білім беретіндері бар.
Қызыл диплом алып, педагог- шебер сертификаты қолында тұрса да, баламен тіл табыса алмайтын бар. Ал күллі мұғалімді айыптау орынсыз, әрі шындыққа жатпайды.
Бағдарламасы дұрыс емес болса, білім сапасы қайдан жақсы болсын! Депутаттар соны ойласын одан да. Жоғарыдағы PIZA сынағынан жоғары деңгей көрсеткен елдердің оқу бағдарламалары баланың дамуына лайықты жасалған.
Ол мемлекеттерде мұғалім көше сыпырмайды, қағаз кемірмейді. Ең болмаса, Эстонияның білім бағдарламасын бір қарап шығыңдаршы: балаға оқу жылдамдығын, оқитвн сөз көлемін, мазмұндау дағдысын, мазмұндаудың түрін, жоспарлаудың түрін, сөздік қорын, ұғу деңгейін талап етіп қояды.
Барлығына көлем, мөлшер береді. 5-сыныпта 200 сөз оқып, мазмұндап, оқиға желісін баяндаса, 10 -сыныпта 5000 сөз оқып, үш жақта мазмұндап, үш түрлі жоспар құрып, сөздік қорына мониторинг жасалады.
Бәрінен бұрын бағалау нормалары анық. Оқу жылдамдығы, сөйлеу деңгейі, жоспарлау дағдысы жеке-жеке бағаланады. Оқушы нормаларға қарап өз бағасын біліп отырады, келесі деңгейге жетуге асығады.
Сол эстондықтар PIZA бойынша үздік ондықтың қатарында. Ендеше, біздің де басқарушылар сондай бағдарлама жасап берсін, соған сай оқулық жасасын, бағалауды нақтыласын!"деп жазды.
