"...ертең директор шақырады": Мұғалімдер министрдің кезекті бастамасын аяусыз сынап тастады

"...ертең директор шақырады": Мұғалімдер министрдің кезекті бастамасын аяусыз сынап тастады

Оқу-ағарту министрі Жұлдыз Сүлейменованың мұғалімдерге құқықтық кеңес беретін бірыңғай байланыс орталығын ашу туралы ұсынысы әлеуметтік желіде қызу талқыланып жатыр. Педагогтерге көмек көрсетуге арналған бастамаға қуана қойғандар аз. Бірі шағымданған мұғалім туралы ақпарат мектеп директорына жетіп, өзіне қарсы қолданылуы мүмкін деп қауіптенсе, енді бірі жаңа орталықтың орнына жалақы мен сынып жетекшілігі үшін төленетін ақы мәселесін шешуді талап етті. Пікірлерде мұғалімдердің министрлікке деген сеніміне қатысты да өткір сауалдар айтылды, деп жазады Democrat.kz.

Оқу-ағарту министрі Жұлдыз Сүлейменова 2026 жылдың соңы немесе 2027 жылдың басында мұғалімдерге арналған бірыңғай байланыс орталығы іске қосылатынын мәлімдеген еді.

Министрдің айтуынша, Астанадағы iKomek қызметінің үлгісімен құрылатын орталыққа кез келген педагог хабарласып, кәсіби және құқықтық мәселелері бойынша кеңес ала алады.

Алайда бұл хабарлама мұғалімдер арасында күткен қолдауды таппаған тәрізді.

Instagram желісіндегі педагогтерге арналған парақшада жарияланған ақпараттың астына ондаған пікір жазылған. Олардың басым бөлігінде жаңа қызметтің тиімділігіне күмән мен мектеп әкімшілігінің ықтимал қысымына қатысты алаңдаушылық байқалады.

«Қоңырау шаласың, ертең директор шақырады»

Желі қолданушыларының бір бөлігі байланыс орталығы арқылы шағымданған мұғалімнің жеке мәліметтері құпия сақталатынына күмән келтірген.

«Позвоните и сразу сообщат в РОО и директору. И вы будете в немилости», – деп жазған пікір білдірушілердің бірі.

Тағы бір оқырман бұл қауіптің себебін кеңірек түсіндірген.

Оның болжауынша, педагог орталыққа шағымданса, бұл туралы мектеп басшылығына хабар берілуі мүмкін. Ал директор шағым айтқан қызметкерге қысым көрсетіп, өзге мұғалімдердің де хабарласуына кедергі келтіреді.

Бұл пікірлер нақты болған оқиға туралы дәлел емес. Дегенмен мұғалімдердің өз құқығын қорғау үшін шағымданудан неге қорқатынын көрсететін маңызды белгі.

Байланыс орталығының жұмысы басталмай жатып туындаған негізгі сұрақ та осы: мұғалімнің жеке деректері мен өтінішінің құпиялығы қалай сақталады?

«Қазір мұғалім емес, статист болып кеттік»

Пікірлерде педагогтердің кәсіби міндетінен тыс жұмыстарға тартылуына қатысты наразылық та байқалады.

«Будем сидеть регистрироваться, ученики уже лишние люди в школе. Мы уже незнаем кто мы на самом деле. Учителя или статисты или.....», – деп жазған оқырман.

Бұл пікір мұғалімдердің сабақ беруден бөлек, түрлі тіркеу, есеп беру және ақпарат жинау жұмыстарымен айналысуына қатысты шаршауын білдіреді.

Тағы бір желі қолданушысы жаңа байланыс орталығына да міндетті тіркеу енгізілуі мүмкін екенін мысқылдаған.

«Самое главное чтобы поголовно не заставляли проходить регистрацию!» – дейді ол.

Яғни мұғалімдерге көмек көрсету үшін ашылатын қызметтің өзі ертең қосымша тапсырмаға айналып кетпей ме деген күдік бар.

«Сынып жетекшілігі үшін бөлек еңбекақы төлеңдер!»

Талқылауда еңбекақы мәселесі де назардан тыс қалмаған.

Бірқатар пікір иесі байланыс орталығына қаржы жұмсаудың орнына мұғалімдердің табысын арттыру қажет деп санайды.

Әсіресе сынып жетекшілерінің жүктемесіне қатысты наразылық айқын көрінеді.

«Уважаемые учителя,надо настаивать ,чтобы классное руководство оплачивали как отдельную штатную единицу.Иначе так и будем за копейки выполнять колоссальную работу», – деп жазған оқырман.

Тағы бір пікірде сынып жетекшілігі үшін жеке штаттық бірлік қарастыру мүмкін болмаса, кем дегенде каникул кезінде педагогтерге демалыс беру ұсынылған.

Оқырман сынып жетекшілерінің жұмыс күнінен тыс уақытта, демалыс күндері де түрлі мәселелерге байланысты мазаланатынын алға тартқан.

Бұл пікірлер мұғалімдердің құқықтық кеңестен бөлек, еңбегінің әділ бағалануын күтіп отырғанын аңғартады.

«Телефон арқылы жалақы көтерілмейді»

Кейбір пікірлерде министрліктің жаңа бастамасына қаржылық тұрғыдан күмән келтірілген.

«Зарплату поднимите и не загружайте телефонные линии...», – дейді желі қолданушыларының бірі.

Енді бірі байланыс орталықтары мен түрлі жаңа жобаларға қаржы табылғанымен, педагогтердің негізгі мәселелері шешілмей келе жатқанын сынға алған.

Сонымен қатар мұғалімдердің бір бөлігі мұндай қызметтің бұрыннан бар ақпараттық арналардан қандай айырмашылығы болатынын түсінбейтінін білдірген.

«Уже такой телеграмм канал года два существует 🤭😅 только работает ли», – деп жазған оқырман.

Бұл пікірден жаңа орталықтың өзгешелігі мен нақты мүмкіндіктері әлі түсініксіз екені байқалады.

Дегенмен байланыс орталығына қанша қаржы бөлінетіні әзірге жарияланған жоқ. Сондықтан оның қымбат немесе тиімсіз жоба болатыны туралы кесімді тұжырым жасауға негіз жоқ.

«Заңды мұғалім біледі. Ал басқалар ше?»

Пікірлер арасында мұғалімдердің құқықтық сауаттылығына қатысты да ой айтылған.

«Думаю, что учитель сам не знает свои права? Знает! И обязанности тоже. Но вот вопрос в другом: никто, кроме учителей, этого не знает!», – деп жазған желі қолданушысы.

Бұл пікірдің астарында мұғалімнің құқығын тек педагогтің өзі білуі жеткіліксіз деген мәселе жатыр.

Егер мектеп басшылығы мен өзге жауапты тұлғалар заң талаптарын сақтамаса, мұғалімге қайта-қайта құқықтық кеңес берудің нәтижесі қандай болмақ?

Бірқатар оқырман мектеп әкімшілігі мен білім бөлімдерінің жауапкершілігін күшейту қажеттігін де көтерген.

Жаңа орталық сенім мәселесін шеше ала ма?

Жарияланым астындағы пікірлер бір ғана телефон қызметіне қатысты емес. Олар білім беру жүйесіндегі әлдеқайда күрделі мәселені — мұғалімдердің өз құқығын қорғау тетіктеріне деген сенімін көрсетеді.

Бірі шағымданғаны үшін қудаланудан қорқады. Екіншісі қосымша тіркеу мен есеп көбейеді деп алаңдайды. Үшіншісі еңбекақы мен жұмыс жүктемесі шешілмей тұрып, жаңа қызмет ашудың мәнін түсінбейді.

Бұл пікірлерді барлық педагогтің ортақ ұстанымы ретінде қабылдауға болмайды. Алайда олар министрлік жауап беруге тиіс нақты сұрақтарды алға шығарып отыр.

Байланыс орталығына хабарласқан мұғалімнің өтініші құпия сақтала ма? Оның шағымы мектеп әкімшілігіне қандай жағдайда жеткізіледі? Педагогке қысым көрсетілсе, кім қорғайды? Ал берілген кеңестің нәтижесі қалай бақыланады?

Жұлдыз Сүлейменова жариялаған бастаманың табысы байланыс орталығына қанша қоңырау түскенімен ғана өлшенбеуге тиіс.

Өйткені мұғалімге телефонның ар жағынан заңды түсіндіру бір бөлек, сол заңның мектеп қабырғасында орындалуын қамтамасыз ету — мүлде басқа мәселе.

Егер педагог орталыққа шағымдануға қорқатын болса, оған тіпті ең білікті заңгердің кеңесі де қолжетімсіз болып қалуы мүмкін.

Барлық жаңалықтар