Қазақстандық балалардың Ұлттық қордан жинақталған ақшасын пайдалану көлемі ондаған миллион долларға жетті. Бағдарлама бойынша жұмсалған 67,8 млн доллардың басым бөлігі тұрғын үй жағдайын жақсартуға бағытталған, деп жазады Democrat.kz.
«Ұлттық қор – балаларға» бағдарламасы аясында қазақстандық балалардың арнайы шоттарына жыл сайын Ұлттық қордың инвестициялық табысының бір бөлігі аударылады.
Бала 18 жасқа толғаннан кейін жиналған қаражатты екі негізгі мақсатқа — білім алуға немесе тұрғын үй жағдайын жақсартуға пайдалануға мүмкіндік бар.
Жарияланған мәлімет бойынша, бағдарлама іске қосылғаннан бері пайдаланылған қаражат көлемі 67,8 млн долларға жеткен.
Соның шамамен 45,2 млн доллары тұрғын үй жағдайын жақсартуға жұмсалған.
Бұл көрсеткіш кәмелетке толған жастардың Ұлттық қордағы жинағын білімнен гөрі баспана мәселесін шешуге жиірек бағыттап отырғанын көрсетеді.
