Алматыда 9 қазаннан бастап 2026–2027 жылдардың жылыту маусымы басталады. Жылу алдымен мектептерге, балабақшаларға және ауруханаларға, кейін көпқабатты тұрғын үйлерге беріледі. Қалада тұрғындардың шағымын қабылдайтын тәулік бойғы штаб жұмыс істемек, деп жазады Democrat.kz.
Алматы қаласының коммуналдық инфрақұрылым және тұрғын үй инспекциясы басқармасы жылыту маусымының 9 қазанда басталатынын хабарлады.
Жылу жүйесіне қосу жұмыстары кезең-кезеңімен жүргізіледі.
Алғашқы кезекте білім беру, денсаулық сақтау және әлеуметтік қорғау мекемелері жылумен қамтамасыз етіледі.
Одан кейін коммуналдық қызметтер көпқабатты тұрғын үйлер мен басқа ғимараттарды қосуға кіріседі.
Қала әкімдігі алғашқы күндері жылу жүйесін реттеу және іске қосу жұмыстары жүргізілетінін ескертті. Сондықтан кейбір ғимараттарда батарея бірден қызбауы немесе уақытша үзілістер болуы мүмкін.
Тұрғындардың өтініштерін қабылдау үшін Алматының сегіз ауданында жауапты мамандар бекітілді.
Сонымен қатар жылыту маусымының басталу кезеңінде тәулік бойы жұмыс істейтін жедел штаб ұйымдастырылады.
Пәтерде жылу болмаса, құбырдан су ақса немесе басқа ақау анықталса, тұрғындар 109 нөміріне хабарласа алады.
Бірыңғай диспетчерлік орталықтың байланыс нөмірі — 225-14-31.
Бұдан бөлек, өтініштерді Open Almaty жүйесі және e-Otinish платформасы арқылы жіберуге болады.
Коммуналдық қызметтер тұрғындарға батареялар мен вентильдердің жарамдылығын алдын ала тексеруге кеңес берді.
Жылу жүйесіндегі суды өз бетінше ағызуға, радиаторларды рұқсатсыз шешуге немесе ортақ құбыр жүйесіне араласуға болмайды. Мұндай әрекеттер бүкіл үйдің жылумен қамтылуына әсер етуі мүмкін.
