Павлодар облысында мұғалімдердің жалақысына қатысты наразылық күшейді. Ұстаздар үйреншікті уақытта ақша түспегеніне алаңдаса, білім басқармасы заң бұзылмағанын мәлімдеді. Алайда әлеуметтік желідегі пікірлер мәселенің әлдеқайда күрделі екенін көрсетіп отыр, деп жазады Democrat.kz.
Павлодар облысының педагогтері қазан айындағы еңбекақысын күтіп отыр. Бұған дейін айлықтарын айдың 20–25-і аралығында алып келген ұстаздар төлем мерзімінің өзгергеніне наразы.
Облыстық білім басқармасы қыркүйек айының жалақысы толық әрі уақытылы төленгенін хабарлады. Ал қазан айының еңбекақысы ай соңына дейін аударылатынын мәлімдеді.
Шенеуніктер Еңбек кодексінің 113-бабына сүйеніп, жалақы келесі айдың алғашқы онкүндігінен кешіктірілмей төленуге тиіс екенін алға тартқан.
Алайда мұнда бір маңызды мәселе бар: заңда көрсетілген шекті мерзімнен бөлек, жалақы төленетін нақты күн еңбек немесе ұжымдық шартта белгіленеді. Сондықтан мұғалімдердің наразылығын тек заңдағы соңғы мерзіммен түсіндіру жеткіліксіз.
Әлеуметтік желіде осы мәселеге қатысты өткір пікірлер жазылды.
«Мәселенің мәні мынада: мұғалімдер шамамен 10 жылдан бері айлықтарын сол айдың 20–25-і аралығында алып келді. Сондықтан көбі несие мен ипотека төлемдерін осы күндерге жоспарлаған. Енді жалақы толықтай жергілікті бюджеттен төленуі керек болғанда, ақша жоқ болып шықты», – деп жазды пікір білдірушілердің бірі.
Бұл – әлеуметтік желі қолданушысының болжамы. Жергілікті бюджетте қаражат жетіспейтіні ресми расталған жоқ.
Тағы бір қолданушы кәсіподақтардың жұмысына күмән келтіріп, мұғалімдердің еңбек құқығын кім қорғайтынын сұраған.
Ал өзге пікір иесі айлықты жұмыс айы аяқталғаннан кейін төлеу қисынды екенін айтып, ұстаздар наразылығына қарсы уәж білдірді.
Дегенмен мәселе тек жалақының қай күні төленетінінде емес. Егер жылдар бойы қалыптасқан төлем тәртібі өзгерсе, педагогтерге бұл туралы алдын ала түсіндіру неге жүргізілмеген?
Бұдан бөлек, білім басқармасы журналистердің қосымша сұрақтарына жауап беруден бас тартқан.
Осы тұста бірнеше сауал туындайды: жалақының үйреншікті төлем күні неліктен өзгерді? Бұған жергілікті бюджеттің жағдайы әсер етті ме? Еңбек шарттарында қандай мерзім бекітілген? Өзгеріс туралы мұғалімдерге алдын ала хабарланды ма?
Заң талаптары бұзылмаған күннің өзінде, педагогтердің қаржылық жағдайына әсер ететін өзгерістерді түсіндіру – білім басқармасының жауапкершілігі.
Өйткені мұғалімнің де несиесі, ипотекасы, отбасы мен күнделікті шығыны бар. Еңбекақының қашан түсетінін білмей алаңдап отыруға мәжбүр ету қалыпты жағдайға айналмауға тиіс.
