Билік мұғалімнен "шоу жасауды" талап етіп отыр

02 желтоқсан 2024

2447

Билік мұғалімнен "шоу жасауды" талап етіп отыр

“Шоу”- деген не? Қызылды -жасылды безендірілген, мұғалім түрлі платформаны қолданып, бір 45 минутта 10-12 тәсіл қолданып, ең аз дегенде құшақтастырып, топтастырып, жұптастырып, “Миға шабуыл”, “Ыстық орындық”, “Балық қаңқасы” “Жапондық бағалау” тәсілдерін, “quizzes” тест, “Padlet” тақтасын қолданып, сабақта отыз оқушыны әр екі минут сайын отырғызып-тұрғызып дрессировать етіп жасаған сабақтарды айтамыз. Әрекеті көп, мақсаты орындалмаған сабақ та осы -ШОУ. Мәселе “шоу” сабақты өткізген мұғалімде емес, мәселе шоу бағдарлама жасап, шоу сабақты талап етіп отырған билікте. Билік мадақтаған “керемет” сабақтың иесінің жеке парақшасын ашсаң, іліп алары жоқ, қазір небір атағы жер жаратын жүлдегер бар “Үздік педагог” деген, солардың сабағының бір элементін көрсең бірден байқайсың мақсаттан ауытқып, лағып тұрғанын. Дым білмейтіндер “тапсырманы саралап беріп” дегенді айтады. “Тапсырманы саралап бер” деген 2016-2019 жылдары тренд болғаны рас. Пандемия кезінде де “саралаймыз” деп қаншалықты сарсаңға түстік. Менің бір оқушым “Апай, мұғалімнің түсіндіргені, көрсеткені оқулықта жоқ” , тапсырмасын орындай алмайсың, ал оқулықта тапсырма көп, мұғалім неге соны орындатпайды?!” деп сұрайды. Бағдарламада грамматика атымен жоқ, бөлімде ғылыми стильді беріп, тапсырмасында шылауды сұрайтын оқулықтарды қолданып келеміз. Мұғалімнің алдында ұғып тұрып, үйіне барғанда тапсырмасын орындауға оқулықтан түйір негіз таппайтынын айтады. Бұл масқараны түзетудің орнына билік мұғалімдерді саралап “Нысаналы мектеп” жобасын енгізіп, одан әрі масқара болып жатыр емес пе?

Бағдарлама мақсаты бойынша нәтижеге жеткен сабақ қана оқушының білім алғанын дәлелдейді: ондай оқушы пікір айтуға, сыни талдауға, анық бағалауға, пікірін жаза алуға, сынын тұжырымдауға үйрене алады, тапсырма орындағанда берілген шартты түсініп орындауы бар, шартты өз шешімімен орындауы бар, жазғанын ауызша айту талабына сай, жазғаны жазылым талабына сай, тыңдағаны тыңдалым талабына сай құрылған сабақты нағыз сабақ дер едім. Бағдарлама мақсатына сай сабақ құрылымын жасай алмайтындар мұғалімнің миын атала жасап жіберді ғой. Амал не?!

Суретте оқушы өз жобасын презентация жасап қорғап тұр. Айтылым дағдысына сын-пікір, ұсыныс айтылған сабақ, “Ұлттың өркениеті қалай дамыды?” деген тұжырым жасады. Ұлты үшін мақтанғанда көздерінен от шашты. “Сол өркениетті қалай заманға сай жетілдіреміз?” дегенде ойлы пікір, өткір ұсыныс айтылды, “Қалай іске асырамыз, жасаймыз?” дегенде салмақты қорытынды шығарды. Бағдарламадағы мақсатқа жету үшін оқушы публицистикалық стиль мен ғылыми көпшілік стиль элементтерін қолданды. Мәтін құрылымын сақтады, деректер мен аргументтерді дәлелді қолданды, сілтеме жасай білді. Сондықтан жақсы сабақта мұғалімнің тәсілі емес, оқушының әрекеті мен тапсырманы орындай алуымен бағалануы керек. Мира БАРКАЗАТҚЫЗЫ, білікті ұстаз. Facebook жазбасы. Фото көрнекілік үшін интернеттен алынды.