Ұстаздарға арналған "Педолимп" байқауында қазақ тілі пәнінен қазақ сыныптарына арналған тапсырмалар берілмегені туралы айтқан танымал ұстаз Ақмарал Шатемірқызы министрлікке сұрау салды деп жазады Democrat.kz.
«Педолимп» байқауына кіріп, қатысайық десек, мұғалімдер ортасында бірнеше сұрақ туындады.
Қазақ тілі пәніннен қазақ сыныптарына арналған тапсырмаларды, бірнеше рет ақтарып, таба алмадық.
«Қазақ тілі – 5,11 класс – для русских классов» бар. Соны тапсыра салайын десек, қазақ мектептеріне жарамсыз болып қалмай ма? Тәуекел етіп тапсыра салуға, құны да аз ақша емес, 5000 теңгеден екен.
Сонымен сұрақ...
Қазақ сыныптарына арналған қазақ тілі пәніне арналған тапсырмалар неге жоқ? Бұл қазақ мектебі мұғалімдері мен оқушыларына дискринимация емес пе?
Қазақ мектептерін осылай күйзеліске түсіріп немесе алаңдату олақтық па әлдеқалай?
Төменде «Педолимп» олимпиадасы хабарландыруы:«Назар аударыңыздар! «Педолимп» олимпиадасы осы сілтеме бойынша өтеді!Сәлеметсіз бе! Барлық пәндер бойынша және барлық өңірлер үшін тіркеу ашылғанын қуана хабарлаймыз! Техникалық жұмыстар толығымен аяқталды, енді Қазақстанның түкпір-түкпірінен оқушылар өтінім бере алады. Қош келдіңіздер!Тапсырмаларға қолжетімділік ашық және ол 1 мамырға дейін жалғасады. Барлығын асықпай, сабырмен үлгеру үшін тапсырмаларды қазірден бастауға кеңес береміз...» Байқауларға қатысу қазақ тілі мектептеріне де маңызды. Қазақ тілді мектептердің байқауларға белсенді қатысуы - тек жеңіс үшін емес, тұтас білім сапасы мен тілдің болашағы үшін қажет.
Біріншіден, байқау - оқушының өзін көрсету алаңы. Қазақ мектебіндегі қазақ тілі мұғалімдері де, оқитын балалар да өз ойын, білімін, шығармашылығын дәлелдей алуы керек. Егер олар мұндай мүмкіндіктерден шет қалса, олардың әлеуеті толық ашылмайды.
Екіншіден, бұл - мұғалімнің кәсіби дамуы. Байқауға дайындық барысында ұстаз жаңа әдіс-тәсілдерді іздейді, тәжірибе жинайды, нәтижесінде сабақ сапасы да артады.
Үшіншіден, қазақ тілінің мәртебесі. Егер республикалық, халықаралық деңгейдегі байқауларда қазақ мектептері аз көрінсе, бұл тілдің білім кеңістігіндегі орнын әлсіретеді. Ал керісінше, белсенді қатысу – «қазақ тілінде де сапалы білім алуға болады» деген нақты дәлел.
Төртіншіден, мотивация. Байқауға қатысқан мұғалім де, оқушы да ынталанады: жауапкершілікті сезінеді, ізденеді", дейді Ақмарал Шатемірқызы.
