Индонезиядағы Virgo Transport 8 паромының апатынан қаза тапқандар саны 66 адамға жетті. Апаттан кейін 16 күн өтсе де 69 адам хабар-ошарсыз кеткендер қатарында қалып, сүңгуірлер су астындағы кемені тексеруді жалғастырып жатыр, деп жазады Democrat.kz.
Virgo Transport 8 паромы 13 қыркүйекте қолайсыз ауа райы кезінде Ява теңізінде аударылған.
Кеме Сурабаядан Оңтүстік Калимантандағы Банджармасинге бара жатқан. Оның бортында 30 экипаж мүшесін қосқанда 243 адам болған.
Қазіргі ресми есеп бойынша 108 адам аман құтқарылды, 66 адамның қаза тапқаны расталды, тағы 69 адам іздестіріліп жатыр.
Іздеу операциясы 16-шы күнге созылды. Ондаған сүңгуір салмағы 4277 тонна болатын су астындағы кеменің ішін тексеріп жатыр.
Операция аса қауіпті жағдайда өтуде. Кеме конструкциялары тұрақсыз, ішінде өткір металл қалдықтары көп, жанармай ағып жатыр және кей бөліктерде қауіпті газ жиналған.
Осы себептерге байланысты сүңгуірлер кейбір жабық бөліктерге әлі кіре алмай отыр. Сүңгу тереңдігі 27 метрмен шектелген.
Индонезия билігі іздеу операциясын жалғастырып, хабарсыз кеткен адамдарды кеме каюталарынан табуға үміттеніп отыр.
