Оқу ағарту министрлігінің мұғалімдердің аттестациясына енгізуі ммкін делінген жаңа ережелерге қатысты белсенді педагог Айман Сағидулла пікір білдіріп, ащы шындықты айтты деп жазады Democrat.kz.
Айман Сағидулла әлеуметтік желідегі парақшасында министр Жұлдыз Сүлейменоваға сұрау салып, "жаңа ережелерге" қатысты: "Біраз дүние өзгеріпті ғой.
Дұрыс, өзгерте беріңіздер.
Жұлдыз Досбергенқызы Сүлейменова ханым!
Егер бәрін өздеріңіз шешіп тастайтын болсаңыздар, бізді неге тегіннен тегін жұмыс тобында 4 ай ұстадыңыздар?
Тесті де алып тастадыңыз.
Белсенді мұғалімдермен ойын ойнадыңыздар ғой кәдімгідей.Неге біз мына өзгерістерді білмейміз, жұмыс тобында отырып?
Біз ашық сабақтың көкесін өтіп бере аламыз.
Бірақ 14-15 ашық сабақ өтіп, ляляля деп жүргенімізде балаларымыз не оқиды?
Шоу сабақты көрсетіп, өзімізге абырой жинап, аттестациядан өтіп жүргенімізде балалардың бар уақыты біз үшін жұмсалатынын білесіздер ме?Өтіріктің майын ішкенше, шындықтың қанын жалағанымыэ дұрыс еді.Бір өтіріктен құтыла алмай жүргенде екінші өтірік.Жұмыс тобынан шығып кеткенім жақсы болды. Әйтпесе оқушылардың көз жасына қалар едім.
Аятжан Ахметжанұлының бір әңгімесі бар еді.
"Ашық сабақ театрланған қойылым",-деген.
Бжб мен Тжб да өтірік. Білім сапасы да өтірік.
Ашық сабақ та өтірік.
Портфолионы алып тастап, тесті қалдыру керек еді.
Мектеп бағдарламасынан келетін тесті білімі бар мұғалімнің бәрі тапсыра алады.
50 сұрақтан қашатын мұғалімге 140 сұрақты табатын оқушы дайындауды тапсыру ұяттау енді.
Жұлдыз ханым! Әлі де ойланыңыз.
Аттестацияда тесті қалдырып, басқа бүкіл құжаттарды алып тастаңыз. Портфолио да шоу сабақ та керек емес.
Тест арқылы ЖОО арналған бүкіл грант таратылады.
Ал, біз сол тестке оқушы дайындайтын мұғалімбіз", деп жазды.
