Танымал белсенді педагог Өмір Шыныбекұлы білім саласындағы кезекті проблемалар туралы айтып, тиісті мекемелерге сұрау салды деп хабарлайды Democrat.kz.
"Кеше Шымкент қаласында Қоғамдық кеңестің кезекті отырысы өтті.
Күн тәртібіне сәйкес Еңбекші ауданының әкімі Досбол Есілбектің, Шымкент қаласы білім басқармасының басшысы Қуаныш Ысқақовтың және Шымкент қаласының білім саласында сапаны қамтамасыз ету департаментінің басшысы Рыскелді Әліштің баяндамалары тыңдалды.
Білім Басқармасы басшысы Қ.Ысқақовтың айтуынша қаламыздағы бірнеше колледжді сенімгерлік басқаруға өткізу туралы келіссөздер жүріп жатқанға ұқсайды.- Осыдан бірнеше жыл бұрын Түркістан Облысының Білім Басқармасы на қарасты бірнеше колледж сенімгерлік басқаруға берілген болатын.Көзімізбен көргеніміз жоқ, ал ел аузынан жеткен әңгімелерге сенсек жағдай онша емес секілді.Ол колледждердегі жағдай қазір қалай?
Бұған зерделеу жүргіздіңіздер ме? - деген сұрағыма басқарма басшысы
- Директорларымен сөйлестік. Бұрынғымен салыстырғанда жақсарып қапты! - деді..
- Қазіргі емес, экс-директорлармен сөйлесу керек еді, сонда ғана обьективті болар еді! - дедім.
Шымкент қаласының әкімдігі әкімі Ғабит Сыздықбеков мырза мен ҚР Оқу-ағарту министрлігі, министр Жұлдыз Сүлейменова ханымға сұрақ:
Жекеменшік мектептердегі проблемаларды көріп отырып, колледждерді серіктестік басқаруға беру қалай болар екен?
Айтпақшы, сыныптарды бейнекамералармен жабдықтау туралы ₸6 млрд-тық шартқа Білім Басқармасы басшысы Қуаныш Ысқақов қол қойыпты.
Камераларды бақылап, мұғалімдерге әдістемелік көмек көрсету 16 қызметкерге жүктеліпті..
10 мың камера деп алсақ, 16 қызметкердің әрқайсысына 625 камерадан түседі екен..
Бір адам бір мезгілде 625 бейнекамераны бақылай алуы, жәй ғана бақылап қоймай, бақылағанын ой елегінен өткізіп, мұғалімге әдістемелік көмек көрсете алуы мүмкін бе?
Кеше вице-премьер Аида Балаева еліміздің білім саласын дамыту туралы көптеген ұсыныстар айтты.
Аида Ғалымқызы тәуелсіз мамандардан жасақталған комиссия құрып, Шымкенттің тәжірибесін бір зерделеп жіберсе артық болмас еді.
Шынында да бір әдіскер бір мезгілде 625 мұғалімге тиімді әдістемелік көмек көрсете алса, неліктен ол тәжірибені республикаға таратпасқа, Жұлдыз Досбергенқызы?" Дейді Шымкент қаласы Қоғамдық Кеңесінің мүшесі, ОАМ ҚК төралқа мүшесі Өмір Шыныбекұлы.
