Оқу-ағарту министрі Жұлдыз Сүлейменова халықаралық конференцияда Қазақстандағы білім беру жүйесін дамытудың басым бағыттарына тоқталды. Министрдің айтуынша, сапалы біліммен қатар, педагогтерді қолдау, инклюзивті оқыту және балалардың қауіпсіздігін қамтамасыз ету маңызды міндет болып қала береді, деп жазады Democrat.kz.
Астанада «Мектеп және адами әлеует: сапалы білім және тең мүмкіндіктер» тақырыбында XV NIS халықаралық конференциясы өтті.
Жиынға 1700-ге жуық қатысушы жиналған. Олардың арасында қазақстандық және шетелдік сарапшылар, педагогтер мен білім саласының мамандары болды.
Конференцияның жабылуында сөз сөйлеген Оқу-ағарту министрі Жұлдыз Сүлейменова еліміздің білім жүйесін дамытудың негізгі басымдықтарын атады.
Министрлік таратқан ақпаратқа сәйкес, олардың қатарында білім сапасын арттыру, педагогтерді қолдау, барлық балаға тең мүмкіндік жасау, қауіпсіз білім беру ортасын қалыптастыру бар.
Конференцияда инклюзивті білім беру, жасанды интеллектіні оқу үдерісінде қолдану, мұғалімдердің кәсіби дамуы және оқушылардың әл-ауқаты мәселелері де талқыланды.
Жиын барысында Жұлдыз Сүлейменова білім саласын дамытуға үлес қосқан азаматтарға мемлекеттік және ведомстволық наградалар тапсырды.
Алайда халықаралық конференцияда көтерілген мәселелердің мектептердегі күнделікті жағдаймен қаншалықты ұштасатыны да маңызды.
Мұғалімдердің кәсіби дамуына мүмкіндік жасау туралы айтылғанымен, педагогтер арасында артық есептілік пен қосымша тапсырмаларға байланысты шағымдар әлі кездеседі.
Барлық балаға тең мүмкіндік беру мәселесінде де мектептердің материалдық жағдайы, мамандармен қамтамасыз етілуі және өңірлер арасындағы айырмашылық назар аударуды қажет етеді.
Сондықтан министрлік жариялаған басымдықтардың нақты нәтижесі алдағы уақытта мектептердегі өзгерістер арқылы көрінуге тиіс.
Өйткені сапалы білім беру туралы ұстанымның құндылығы оны халықаралық мінберде жариялаумен емес, әр мектепте жүзеге асырумен өлшенеді.
