Журналист, қоғам белсендісі, білім саласындағы былықтардың бетін ашып жүрген Ләззат Асанова Оқу ағарту министріне тікелей талап қойды деп жазады Democrat.kz.
"Білім саласындағы әділетсіз марапаттау – жүйелі дертке айналды**
Жетісай ауданында мұғалімдерді марапаттау төңірегіндегі дау – еліміздің білім саласындағы ең өзекті, әрі жылдар бойы шешілмей келе жатқан мәселенің айқын көрінісі.
Биылғы «Ұстаздар күніне» орай шебер-педагогтарды марапаттау тізімі қоғамда үлкен резонанс тудырды. Себебі аудан бойынша 45 шебер-педагог болса, соның 37-сі ғана марапатталып, 8 ұстаз түсініксіз себеппен тізімнен алынып қалған.
Бұл – жай ғана техникалық қателік емес. Бұл – мұғалімнің еңбегін бағалау жүйесіндегі әділетсіздіктің тамыры терең кеткенін айғақтайды.
Критерийі жоқ, ашық емес шешім – педагог беделін таптау….
Ұстаздар шағымында көрсетілгендей, тізімді құру барысында ашық конкурс, нақты критерий немесе ресми түсіндіру болмаған. Тіпті марапаттан қағылған 8 ұстазға «неге именно Сіздертізімге енбей қалдыңыздар?»- деген сұраққа да жауап берілмеген.
Білім саласының басты қағидасы – әділдік пен ашықтық. Ал Жетісайдағы оқиға – бұл қағидалардың аяқасты болғанының дәлелі.
Мұндай жағдайда мұғалімдердің ашынуы орынды. Себебі марапат – біреудің жеке құқығы емес, еңбекпен келген мемлекеттік мойындау.
Министр Жұлдыз Сүлейменова неге араласпай отыр?
Бүгінгі таңда Білім министрі Жұлдыз Сүлейменова ұстаздардың мәртебесін көтеру, саланы реформалау жайында жиі айтады. Бірақ дәл қазір сол принциптер сынаққа түсіп отыр.
Егер елдің түкпір-түкпірінде мұғалімді марапаттау мәселесінің өзі әділетсіз шешіліп жатса, онда министрліктің бақылау тетігі қаншалықты тиімді?
Жетісайдағы жағдайға нақты реакция жасалмайынша, «педагог мәртебесі» деген ұрандар – бос сөз болып қала береді.
Министрліктің үнсіз қалуға хақы жоқ.
8 ұстаздан кешірім сұрау – министрдің моральдық міндеті
Әділетсіздікті түзетудің алғашқы қадамы – қателікті мойындау. Жетісайдағы 8 ұстаздан кешірім сұрау – Жұлдыз Сүлейменова үшін әлсіздік емес, жауапкершілік көрсеткіші.
Министрдің тікелей араласуы керек:
• Марапаттау тізімін қайта қарап,
• Шешімді қабылдаған лауазымды тұлғалардың әрекетіне баға беріп,
• Ашық критерий енгізіп,
• Әділетсіз шешімнің алдын алу тетігін жасауы тиіс.
Кешірім сұрау – осы процестің бірінші әрі маңызды қадамы.
Білім саласы былыққа батып бара ма?
Еліміздің ең маңызды жүйесі – білім.
Бірақ соңғы жылдары саланың ішіндегі:
• формальды марапаттау,
• жабық шешім қабылдау,
• «өз адамдарын өткізу»,
• педагог еңбегінің әділетсіз бағалануы қоғамның сенімін төмендетіп барады.
Мұғалімнің еңбегі еленбесе – білім сапасы да жақсармайды. Ал әділетсіз марапат жүйесі – ұстаздарды жікке бөледі, ұжымда алауыздық тудырады.
Бұған жол беруге болмайды.
Ел не күтеді?
Ел қоғамы педагогтың мәртебесін құр сөзбен емес, іс жүзінде қорғауды күтеді.
Министр Жұлдыз Сүлейменова бұл дауға бейжай қарамай, 8 ұстаздың алдында моральдық жауапкершілігін көрсетсе, бұл бүкіл ұстаздар қауымына берілген үлкен белгі болмақ:
Білім саласында әділетсіздікке орын жоқ.
Жетісайдағы жағдай – жай аудандық оқиға емес. Бұл – бүкіл Қазақстандағы марапат, баға, конкурс, кадр саясатының ашықтығын талап ететін үлкен сигнал.
Министрлік нақты қадам жасамаса, былық жалғаса береді.
Ал кешірім сұрау – биліктің әлсіздігі емес, әділдіктің бастауы"деп жазды Ләззат Асанова.
