Алматыны жеті жыл басқарған, ЭКСПО-2017 мен «Самұрық-Қазынаның» тізгінін ұстаған Ахметжан Есімов қазір үлкен саясаттан алыстаған. Бірақ Назарбаевтың туысы саналатын экс-шенеуніктің отбасы бизнес әлемінен кеткен жоқ: қызының дәулеті 207 млн долларға бағаланса, туған бауырының жол компаниясы бір жылда 3,8 млрд теңге таза пайда тапқан, деп жазады Democrat.kz.
Ахметжан Есімов – Нұрсұлтан Назарбаевтың жиені ретінде белгілі, Назарбаев дәуірінде ең ұзақ уақыт жоғары қызметте жүрген тұлғалардың бірі. Ол министр, вице-премьер, Президент Әкімшілігінің басшысы, Алматы облысы мен Алматы қаласының әкімі болды. Кейін «Астана ЭКСПО-2017» ұлттық компаниясы мен «Самұрық-Қазынаны» басқарды. 2021 жылы қордан кеткен соң Назарбаевтың штаттан тыс көмекшісі болып тағайындалған. 2026 жылғы қыркүйектегі ашық анықтамалықтарда да оның қызметі осылай көрсетіледі.
Алайда соңғы жылдары Есімовтің өзі саясаттан гөрі гольф алаңынан жиі көрінеді. 2026 жылғы мамырда Алматыдағы BMW Golf Cup Kazakhstan турнирінде ерлер арасында бірінші орын алып, Қазақстан атынан 2027 жылы Оңтүстік Африкада өтетін әлемдік финалға жолдама алды.
Есімовтің жеке дәулеті қанша екені белгісіз. Forbes Kazakhstan оны бай кәсіпкерлер рейтингіне енгізбейді және оның капиталына қатысты қазіргі ашық бағалау жоқ. Есімовтің өзі 2013 жылы Алматы әкімі болып тұрған кезде Астанада гольф алаңы маңында шағын үйі, ал жұбайының Алматыда үйі барын айтқан. Сол кезде оның айлығы 645 мың теңге болған. Бұл – 13 жыл бұрынғы мәлімет, қазіргі мүліктік жағдайын білдірмейді.
Есесіне оның кіші қызы Айжан Есімнің капиталы ашық бағаланады. Forbes Kazakhstan 2026 жылы оның дәулетін 207 млн доллар деп есептеп, елдегі ең бай 75 кәсіпкердің ішінде 47-орынға қойды. Байлығының елеулі бөлігі 2021 жылы «Қазфосфаттағы» үлесін сатудан қалыптасқан. Айжан Есімнің қазір KRIDA фитнес-клубындағы, «Алматынан» және Петропавл нан-тоқаш комбинаттарындағы үлестері бар.
Айжанның бұрынғы күйеуі Ғалымжан Есенов та Қазақстандағы аса ауқатты кәсіпкерлердің бірі. 2026 жылы Forbes оның байлығын 564 млн долларға бағалады. Оның активтері агробизнес, телекоммуникация, білім беру және басқа салаларды қамтиды. Айжан Есім мен Есенов ажырасқанымен, Forbes олардың бірқатар бизнесте ортақ мүддесі сақталғанын жазады.
Есімовтің үлкен қызы Ғалия Есім де кәсіпкерлікпен айналысады. Ашық реестрлерге жасалған зерттеуде оның білім беру қызметін көрсететін Bonas Macfarlane Education Kazakhstan және BM Education компанияларына, сондай-ақ Almaty Publicity жарнама агенттігіне қатысы бары көрсетілген.
Тағы бір қызық дерек – Есімовтің туған бауыры Сейітжан Есімовтің бизнесі. Ол «Қарағанды жолдары» компаниясының жалғыз иесі. Компания 2024 жылы 19,97 млрд теңге түсім алып, 3,8 млрд теңге таза пайда тапқан. Кәсіпорын жол, аэродром және басқа инфрақұрылым нысандарын салумен айналысады.
Осылайша, Ахметжан Есімовтің өзінің қанша байлығы бары ашық емес. Бірақ отбасының экономикалық ауқымы айқын: бір қызының ресми бағаланған капиталы – 207 млн доллар, бұрынғы күйеу баласының байлығы – 564 млн доллар, туған бауырының жол компаниясының бір жылдық түсімі – 20 млрд теңгеге жуық.
Ал билікке келсек, Есімовтің қыздарының қазіргі мемлекеттік қызметте жүргені туралы ашық дерек жоқ. Оның саяси салмағын айқындаған ең үлкен туыстық байланыс – Қазақстанды отыз жылға жуық басқарған Нұрсұлтан Назарбаевпен туыстығы. Бүгінде Есімовтің өзі үлкен саясатта көрінбегенімен, оның әулеті бизнес пен ірі капитал кеңістігінде әлі де анық байқалады.
