Әлеуметтік желіде ұстаздар мен қарапайым азаматтар оқушы мен мұғалімнің арасында болған кикілжіңнің салдарын қызу талқылап, кей ата-ананы сотқа беру керек деген бастама көтеруде деп жазады Democrat.kz.
elegant_your атымен тіркелген әлеуметтік желі қолданушы Threads-те: "Ата-ананың қысымынан , мұғалім 3 күн комада жатып давлениеден қайтыс болды.Рахмет!"деген жазба жариялады.
Жазба авторының аты да, тегі де жоқ. Десек те, сауатты жазбасына қарап, педагог болуы мүмкін екенін болжадық.
Жоғарыда сөз болған жазбаға қатысты жұрт жаға ұстап қана қоймай, "мұғалімді қорғау керек", "министр, депутаттар қайда қарап отыр", "мына мәселені резонанс етуіміз керек", "мынау деген масқара жағдай", "тәрбиесіз баласы үшін мұғалімге кінә тағатындарды соттату керек" деген сыңайда пікір жазуда.
Өз тарапымыздан жазба жариялаған парақша иесінің жекесіне шығып, айтып отырған жағдай қай аймақта, қашан болғанын сұрап хат жолдадық. Әзірге жауап бермеді.
Десек те, мұғалімдердің қазіргі кезде басты проблемасы оқушы емес, оқушының ата-анасы болғанын жоққа шығару мүмкін емес.
Тоқырау жылдары білімнен, тәрбиеден қағылған көп бала бүгін де өздері әке мен шеше болып, балалы болғанын ескерсек, ондайлардан туған баланың ақылды, мәдениетті, білімді боларына сенімнен гөрі күдік басым.
Дәл қазір педагогтарды қан қақсатып жүрген ата-ананың 60-70 пайызы өздері кезінде дұрыс тәрбие мен білім алмағандар екені сөзсіз. Ең өкініштісі, бұл сорақы жағдай қашанға дейін жалғаспақ?
Мұғалімдер қашанғы тепсініп, бажылдап, аузынан ақ ит кіріп, көк ит шыққан шешелердің табанында езіле бермек?
Төменде қазіргі мұғалімдердің жағдайына қатысты бірқатар пікірлерді жинақтап, назарларыңызға ұсындық, оқыңыз, ойланыңыз...
Дайындаған Әлия БОЛАТҚЫЗЫ.
