Алматы облысының тұрғыны бірнеше жыл бойы қызын өз атына тіркей алмай жүргенін айтып, көпшіліктен көмек сұрады. Қытайда дүниеге келген баланың құжатында оның биологиялық ата-анасы емес, басқа адамдар көрсетілген. Әкесі бұл жағдайдың қалай болғанын түсіндіріп, енді қызын Қазақстаннан шығарып жіберуі мүмкін екенін айтып алаңдады. Отбасының мәселесіне Ішкі істер министрлігі де түсініктеме берді, деп жазады Democrat.kz.
Алматы облысының тұрғыны Абай Дәлелхан қызы Раянаның құжаттарын заңдастыру мәселесін бірнеше жылдан бері шеше алмай жүргенін мәлімдеді.
Stan.kz редакциясына берген сұхбатында ол отбасының басынан өткен жағдайды баяндаған.
Абай Дәлелхан 2011 жылы Қытайдан Қазақстанға қоныс аударып, 2013 жылы азаматтық алған.
Кейін алғашқы некесі бұзылған.
2015 жылы Қытайға барып, екінші рет отбасын құрған.
Алайда Қытайдағы құжаттар базасында оның алғашқы некесі әлі тіркеліп тұрған.
Ер адамның айтуынша, әйелі босанар кезде неке куәлігіне байланысты мәселе туындаған.
Сол себепті ол жаңа туған қызының құжатына ата-анасы ретінде өзінің інісі мен келінін көрсеткенін мойындады.
Кейін бұл шешім отбасы үшін үлкен қиындыққа айналған.
Қыздың биологиялық ата-анасы мен құжатта көрсетілген адамдар сәйкес келмегендіктен, баланың құқықтық мәртебесін реттеу күрделенген.
Абай Дәлелханның айтуынша, әйелі мен қызы біраз уақыт Қытайда қалған.
2023 жылы отбасы қызымен қайта қауышқан.
Алайда Раянаның құжат мәселесі әлі толық шешілмеген.
Қазір қыз төртінші сыныпта оқиды.
Әкесі баласының Қазақстанда болу мерзімі аяқталса, оны қайтадан Қытайға жіберуі мүмкін деп алаңдайды.
Отбасы ДНҚ сараптамасын жасатқанын және сотқа жүгінгенін айтады.
Ішкі істер министрлігі редакцияның сауалына жауап беріп, баланың құқықтық мәртебесін реттеу үшін заңды өкілдері тұрғылықты жеріндегі көші-қон қызметіне жүгінуге тиіс екенін түсіндірген.
Ведомство сондай-ақ некенің бұзылғанын растайтын құжаттарды Қытайда пайдалану үшін заңдастыру мәселесін тиісті органдар арқылы шешу қажеттігін хабарлаған.
Әзірге Раянаны Қазақстаннан шығару туралы ресми шешім қабылданғаны жөнінде ақпарат жоқ.
