Украина президенті Владимир Зеленский Нью-Йоркте Дональд Трамппен кездесіп, Ресей мен Украина арасындағы энергетикалық инфрақұрылымға шабуылдарды өзара тоқтату мәселесін көтермек. Келіссөз қыс қарсаңында Украина энергетикасына жасалатын соққылар қаупі күшейген тұста өтеді, деп жазады Democrat.kz.
Кездесу БҰҰ Бас Ассамблеясы аясында өтеді.
Reuters мәліметінше, Зеленский Ресей мен Украина бір-бірінің энергетикалық нысандарына шабуыл жасамауы жөніндегі мораторий идеясын қайта көтеруге ниетті.
Украина билігі қыс алдында электр және жылу инфрақұрылымына жасалатын жаңа шабуылдардан қауіптеніп отыр.
Сонымен бірге Киев Ресейдің мұнай өңдеу және энергетикалық нысандарына дрон соққыларын Мәскеуге қысым жасаудың маңызды құралы деп санайды.
Трамп Украинадан Ресейдің мұнай инфрақұрылымына шабуылдарды тоқтатуды сұраған.
Франция президенті Эммануэль Макрон да Трамппен кездесіп, энергетикалық нысандарға шабуылдарды өзара тоқтату мүмкіндігін талқылағанын мәлімдеді.
Зеленский АҚШ-тан қосымша Patriot әуе қорғанысы жүйелерін де сұрауы мүмкін. Келіссөздің нақты нәтижесі кездесу аяқталғаннан кейін белгілі болады.
