Атырау маңындағы Еркінқала ауылында жергілікті тұрғындар мұсылман зиратындағы бүлінген құлпытастарды байқап қалды деп жазады Democrat.kz. сайты Ақ Жайыққа сілтеме жасап.
Бірнеше қабірде ислам дінінің белгісі саналатын айшықтар сындырылған.
Куәгерлердің айтуынша, кейбір жеке элементтерге ғана емес, толық орнатылған құлпытастар да бұзылған. Ауыл тұрғындары бұл жағдайға алаңдап, мұны әдейі жасалған вандализм болуы мүмкін деп санайды.
Еркінқала тұрғыны Ербол оқиғаның тұрғындардың қатты ашу-ызасын туғызғанын жеткізді: «Біз туыстарымыздың бейіт басына келген едік, айшықтардың сынып жатқанын көрдік. Мұндай сорақы істер жасауға ешкімнің құқығы жоқ. Не болғанын және оған кім жауап беретінін білгіміз келеді».
Қазіргі уақытта зақымдардың ауа райынан ба, әлде қасақана жасалған әрекеттен бе, пайда болғаны белгісіз. Дегенмен ауыл тұрғындары аумақты тексеріп, себептерін анықтауды талап етуде.
Материал дайындалған сәтте полиция мен Еркінқала әкімдігі ресми түсініктеме берген жоқ. Жергілікті тұрғындар биліктен зираттың қауіпсіздігін қамтамасыз етіп, мұндай жағдайдың қайталанбауын сұрайды.
Полиция дерегінше, қазіргі уақытта қылмысқа қатысы бар тұлғаларды анықтауға бағытталған қажетті жедел-іздестіру іс-шаралары жүргізілуде.
Ведомство өкілдері тергеу нәтижелері қосымша хабарланатынын айтты.
