Қазақстанда болашақ бірінші сынып оқушыларының ата-аналары BINOM мектебіне қабылдау кезінде қиындықтарға тап болғандарын және іріктеу үдерісінің ашықтығына күмән келтіретіндерін мәлімдеді деп жазады Democrat.kz.
Олардың айтуынша, OQU жаңа платформасы арқылы құжаттарды уақытында тапсырғанына қарамастан, кейбір өтінімдер нақты түсіндірмесіз қабылданбаған.
Ата-аналардың бірі өтінішті 27 мамыр күні сағат 09:05-те тапсырғанын айтты. Жүйе бастапқыда өтінімді қабылдағанымен, түнде «құжаттар талапқа сәйкес емес» деген себеппен бас тарту туралы хабарлама келген. Оның айтуынша, 28 мамырда мектепке жүгінген кезде қызметкерлер нақты қандай қате кеткенін түсіндіре алмаған.
Ата-аналардың сөзінше, бас тартуға фотосуреттердің сапасы, баланың суретке түсу бұрышы немесе жүктелген файлдардың форматы (JPEG, PDF) сияқты формалды себептер көрсетілген. Сондай-ақ денсаулық паспортына қатысты да сұрақтар туындаған. Өтініш берушілердің айтуынша, ол №052 нысанына сәйкес болуы тиіс, алайда кейбір талаптар ресми нұсқаулықтарда көрсетілмеген және eGov порталы арқылы автоматты түрде жүктеледі.
Кейбір ата-аналар өтінішті қайта тапсырғанымен, балалардың мектепке қабылданбағанын айтады. Жүйе сыныптардың толып қалғаны туралы хабарлама жіберген.
Сонымен қатар, ата-аналар тілдік сыныптарды бөлу мәселесіне назар аударды. Олардың айтуынша, мектепте жеті қазақ сыныбы және үш орыс сыныбы ғана ашылған, ал жалпы қабылдау шамамен 20 сыныпты құрайды.
Ата-аналардың айтуынша, оларға жақын маңдағы №95, №101 және №104 мектептеріне жүгіну ұсынылған. Алайда бұл мектептерде орындардың шектеулі екені және алдымен микроучаске бойынша тіркелген балалар қабылданатыны айтылған. Кейбір мектептер резервтік тізімге қою мүмкіндігін ұсынған.
Асель Еркібаеваның айтуынша:
— BINOM-да бар болғаны үш орыс сыныбы және жеті қазақ сыныбы бар. Биыл олар 20 сынып бітіреді. Неліктен тек үш орыс сыныбын қабылдайтынын сұрағанда, кабинеттер жетіспейтінін айтты. Бірақ кабинеттер бар ғой. Біз енді қайда барарымызды білмейміз. №95 мектеп бізді тіркеу бойынша жатпайтындықтан қабылдамайтынын айтты. Алдымен өз микроучаскесіндегі балаларды қабылдайды. Бізді тек резервке қоя алады. Балам мүлде бірінші сыныпқа бара алмай қалуы мүмкін деп қорқамыз. №107 мектеп тек қазақ тілінде оқытады, ал біз орыс сыныбын қалаймыз, себебі баламыз орыс тілінде сөйлейді. №104 мектепте де орын жоқ, сондықтан қабылдамайды.
Тағы бір ана олардың BINOM мектебінің дәл қарсысында тұратынын айтты. Оның сөзінше, дайындық курстарына 10 ай ішінде 600 мың теңге төлегенімен, бала мектепке қабылданбаған.
Басқа ата-аналар құжаттарының толық әрі дұрыс болғанын, фотосуреттердің де талапқа сай екенін айтқан. Соған қарамастан, өтінімді сағат 09:09-да тапсырған кезде жүйе орын жоқ деген жауап берген. Ал кейбір балалардың өтініштері 09:13 және 09:16-да қабылданған.
Тағы бір ана олардың отбасы 26 мамырға дейін осы мектептің микроучаскесіне кіргенін, бірақ 27 мамырда бұл мәртебенің өзгергенін білгенін айтты. Отбасы мектепке жақын тұрса да, қабылдаудан тыс қалған.
Ал бір әке отбасының мектеп микроучаскесіне жататынын, өтініш тапсырғанымен, сыныптардың толып кетуіне байланысты бас тарту алғанын мәлімдеді.
