Қазақстан Ұлттық қауіпсіздік комитетінің бұрынғы төрағасы, қазір Венада тұратын Әлнұр Мұсаев журналист Динара Егеубаеваға берген сұхбатында билік транзитіне қатысты өз нұсқасын айтты деп жазады Democrat.kz. Оның мәлімдемелерін «Республика» басылымы жариялады.
Әлнұр Мұсаевтың айтуынша, Назарбаев өзінің мұрагері ретінде бірнеше саяси тұлғаның кандидатурасын қарастырған. Олардың арасында қазіргі президент Қасым-Жомарт Тоқаевпен бірге Иманғали Тасмағамбетов және Дариға Назарбаева да болған.
Алайда бұрынғы ҰҚК басшысы болашақ президентті анықтауда Қазақстанның ішкі саяси есебінен бөлек, Ресей билігінің көзқарасы да ескерілгенін алға тартады.
Оның сөзінше, Назарбаев мұрагер мәселесін Ресей президенті Владимир Путинмен бірнеше рет талқылаған. Мұсаев мұны бұрынғы президенттің Мәскеуге жасаған сапарларымен және Назарбаев отбасы ішінде жүрген әңгімелермен байланыстырады.
Дегенмен, бұл — Әлнұр Мұсаевтың жеке мәлімдемесі. Тоқаевтың кандидатурасы Ресей билігімен ресми түрде келісілгенін дәлелдейтін ашық құжат немесе Қазақстан билігінің ресми растауы жарияланған жоқ.
Дариға Назарбаева неге өтпей қалды?
Дариға Назарбаева ұзақ уақыт бойы әкесінің ықтимал саяси мұрагерлерінің бірі ретінде аталып келді. Оның Мәжілісте, Үкіметте және Сенатта жоғары қызметтер атқаруы бұл болжамды күшейткен болатын.
Әлнұр Мұсаевтың айтуынша, Дариға Назарбаеваның мемлекет басшысы болуға үлкен амбициясы болған. Алайда оның бұрынғы күйеуі Рахат Әлиевке қатысты дау-дамай және ұлы Айсұлтан Назарбаевтың көпшілікке жариялаған мәлімдемелері саясаткердің беделіне ауыр соққы болып тиген.
Мұсаев дәл осы отбасылық жанжалдар Дариға Назарбаеваның президенттік перспективасына нүкте қойды деп есептейді.
Алайда Дариға Назарбаеваның кандидатурасы ресми түрде президенттікке ұсынылған емес. Сондықтан оның «іріктеуден өтпей қалғаны» жөніндегі пікір де құжатпен расталған ресми дерек емес, сұхбат кейіпкерінің саяси пайымы саналады.
