Спорттық бағдарламалау федерациясының президенті Бағдат Мусин Қазақстанда жасанды интеллект бойынша халықаралық олимпиада (IOAI) өтетіні туралы келісімшартқа қол қойылғанын мәлімдеді, деп хабарлайды Democrat.kz.
Әлемнің ең мықты жас мамандары бас қосатын беделді жарыс 2026 жылдың тамыз айында Астана қаласында ұйымдастырылмақ.
Бұл шешім туралы Мусин әлеуметтік желіде жазып, Қазақстанның мұндай ауқымды шараға таңдалуы кездейсоқ еместігін және еліміздің технологиялық экожүйесінің қарқынды дамып келе жатқанын жеткізді. Оның сөзінше, соңғы жылдары мемлекетте спорттық бағдарламалауды дамыту мен әлемдік деңгейдегі кадрларды даярлаудың тұрақты базасы қалыптасқан.
Мәселен 2024 жылы Қазақстан ICPC бағдарламалаудан әлем біріншілігінің финалын өткізсе, 2025 жылы ұлттық құрама Қытайдағы жарыста әлем бойынша төртінші орын алып, тарихтағы ең жақсы нәтижелердің бірін көрсеткен.
Сонымен қатар ол жасанды интеллектті дамыту министрі Жаслан Мәдиевтің еңбегін атап өтіп, мемлекеттік саясат пен кәсіби қоғамдастықтың бірлесе жұмыс істеуі жүйелі нәтижелерге қол жеткізуге мүмкіндік беретінін айтты.
Федерация өкілдері IOAI жарысын өткізу тек мәртебелі халықаралық оқиға ғана емес, сондай-ақ стратегиялық даму құралы екенін алға тартып отыр. Мұндай сайыстарға қатысу жаһандық таланттар нарығына жол ашады, өйткені ірі технологиялық компаниялар халықаралық олимпиадалардың финалдарын кадр іздеу алаңы ретінде пайдаланып, мықты қатысушыларды оқу кезінде-ақ іріктеп алады.
Бұдан бөлек қазақстандық мамандар жетекші әлемдік технологиялық командалардың бір бөлігіне айналып, жаңа деңгейдегі адами капитал экспорты артады. Сондай-ақ мұндай іс-шаралар елге халықаралық серіктестіктерді, университеттерді және технологиялық секторға инвестицияларды тартады.
Әлемдік деңгейдегі олимпиадаларды өткізу ішкі бәсекелестікті күшейтіп, мамандарды даярлау сапасын арттырады және Қазақстанның аймақтық технологиялық хаб ретіндегі беделін бекіте түседі.
Астанада бұл олимпиаданы өткізу елімізде жарияланған Жасанды интеллект жылымен тікелей байланысты және цифрлық экономиканы дамыту бойынша жүйелі саясаттың маңызды бір бөлігі болып саналады.
«Бұл жаһандық технологиялық бәсекелестік кезеңінде Қазақстанның сенімді серіктес ретіндегі үлкен мойындалуы», – деді Мусин.
Федерация олимпиада таланттарды, жаңа идеялар мен халықаралық серіктестіктерді тартатын орталыққа айналып, еліміздің әлемдік технологиялық картадағы орнын нығайта түсетініне сенімді.
