Біріккен Араб Әмірліктерінің солтүстік жағалауында теңізге мұнай төгілуіне байланысты бірнеше әмірлікте жағажайлар уақытша жабылды. Мұнай дағының аумағы спутниктік суреттерде шамамен 160 шаршы шақырымға жеткені байқалған. Билік ластанудың таралуын бағалап, жағалауды қорғау жұмыстарын жүргізіп жатыр, деп жазады Democrat.kz.
Reuters агенттігінің хабарлауынша, 23 қазанда БАӘ билігі теңіздегі танкерден мұнай төгілгеннен кейін ластануды оқшаулау жұмыстары басталғанын мәлімдеген. Umm Al Quwain қаласының маңындағы жағалау аумақтары уақытша жабылып, балықшыларға зардап шеккен суларға бармау ескертілген.
Көршілес Шарджа әмірлігінде Al Hamriyah жағажайына кіру де сақтық шарасы ретінде шектелген. Ал 24 қазанда Ras Al Khaimah билігі өз аумағындағы барлық жағажайды қосымша хабарламаға дейін жабу туралы шешім қабылдаған.
Еуропалық Copernicus Sentinel-2 спутниктерінің суреттерінде теңіз бетіне таралған үлкен мұнай дағы көрінген. Reuters дерегіне сүйенген сарапшылар оның көлемін шамамен 160 шаршы шақырым деп бағалаған.
Қазіргі уақытта мұнай төгілуіне қатысы бар танкердің атауы мен апаттың нақты себебі ресми түрде жарияланған жоқ. Reuters дереккөздері Gem No.2 танкерін атағанымен, бұл ақпарат билік тарапынан расталмаған.
Оқиға экология мен жағалаудағы шаруашылыққа қатысты алаңдаушылық туғызды. Мұнайдың теңізге таралуы балықтарға, өсімдіктерге және жағалау экожүйесіне зиян келтіруі мүмкін. Бұған қоса, БАӘ ауыз судың едәуір бөлігін тұщыландыру арқылы өндіретіндіктен, су инфрақұрылымының қауіпсіздігі де маңызды.
Билік қоршаған ортаға ықтимал әсерді бағалап, ластануды бақылау шараларын жалғастырып жатыр. Жағажайлардың қашан қайта ашылатыны әзірге белгісіз.
