Павлодар облысында ата-анасының қамқорлығынсыз қалған қыз мемлекет жіберген қателіктің зардабын жылдар бойы тартқан деп жазады Democrat.kz.
Оны тұрғын үй кезегіне уақытында қоймаған, кейін тіпті кезектен шығарып тастаған. Ақырында сот бұл жағдайға қыздың кінәсі жоқ екенін мойындап, оның құқығын қалпына келтірді.
Павлодар облысының тұрғыны баспана кезегін 2008 жылдан бастап есептетуге сот арқылы қол жеткізді.
Ол сол жылы балалар үйіне түскен. Алайда ата-анасының қамқорлығынсыз қалған бала ретінде тұрғын үй кезегіне тек 2014 жылы ғана ресми тіркелген.
Бұл алты жылдық айырмашылық баспана кезегінде өте маңызды. Себебі кезекке ертерек тұрған адамның тұрғын үй алу мүмкіндігі де соғұрлым алға жылжиды.
Оқиға мұнымен аяқталмаған. 2023 жылы қыз басқа елді мекенге көшкеннен кейін оны тұрғын үй кезегінен мүлдем шығарып тастаған.
Кейін оның өтініштерінен соң кезегі қайта қалпына келтірілгенімен, бастапқы мерзім ретінде 2014 жыл көрсетілген. Сонда қыз сотқа жүгінді.
Сот маңызды жағдайды назарға алған: 2008 жылы балалар үйіне түскен кезде ол кәмелетке толмаған еді. Демек, тұрғын үй кезегіне өзін өзі тіркеуге міндетті де, қабілетті де болған жоқ. Бұл міндет баланың қамқорлығына жауапты мемлекеттік органдар мен ұйымдардың мойнында болған.
Сот мемлекеттік құрылымдардың кезінде орындамаған міндетінің салдарын бала көтеруге тиіс емес деген қорытындыға келген. Нәтижесінде әйелдің тұрғын үй кезегі 2008 жылдан бастап қалпына келтірілді.
Сот шешімі заңды күшіне енген.
Бұл оқиға әлеуметтік осал топ өкілдерінің құқығы қағаз жүзінде бекітілгенімен, оны іс жүзінде қорғау үшін адамның кейде жылдар бойы мемлекеттік мекемелермен дауласуына тура келетінін көрсетеді.
