Журналист Оңғар Қабден әлеуметтік желі парақшасы арқылы Абай облысының әкімі Берік Уәлиге өтініш жасады деп жазады Democrat.kz.
"Абай облысының әкімі Берік Уәлидің назарына!
Берік Уәлиұлы облыс басшылығына келгелі ауқымды істер атқарылуда.
Оны облыстың еңкейген қартынан еңбектеген баласына дейін айтып та жүр! Әкімдер ат ізін салмаған түкпірдегі ауылдарға дейін аралап, мәселелерін көзбен көріп, ауылдардың жағдайымен танысып шықты.
Ақсуат маған бөтен емес, өз ауылым. Көздегеніміз мемлекеттік мүдде болғандықтан осындағы заңсыздыққа көз жұмып қала алмадым.
Ең бірінші мәселе, Ақсуат ауданы, Құмгөл ауылындағы Тебіске өзенінің тасы мен құмы неліктен Ақжар жаққа тасымалдануда? Сонда тұрған зауыт кімдікі? Ақжар ол Шығыс Қазақстан облысының Тарбағатай ауданы.
Абай облысы, Ақсуат ауданының табиғи байлығы қалай ғана басқа облысқа, басқа ауданға тасымалдануда? Қадағалаушы орган прокуратура танауының астындағы заңсыздықты қалай көрмей отыр? Әлде, көргісі келмей отыр ма? Прокурор жағдайдан хабарсыз дегенге өз басым сенбеймін.
Екінші, ауданның бюджеті не үшін оңды солды жұмсалуда? Ақсуатқа кіре берістегі төрт жолақты жолды салуға 115 миллион теңге бөлген. Ол жолдың жоба, жоба сметамалық құжаттары жасалмаса да, бұл ақшаны қалай бөлген?
Қасындағы жарықтандыру мен тротуарға қанша ақша бөлінген? Ол неге құпия? Жобалық сметасы болмаса да ақшаны кім бөлді? Әкімдік? Мәслихат?
Ақсуатты айналып өтетін айналма жолға осы күнге дейін 1 миллиардтан аса ақша кетті. Асфальт жамылғысының өзін жасауға 262 миллион жұмсалған. Сол асфальттің қалыңдығы 2-3 см ғана. Қолданылған битум сапасы төмен.
Жол толқын-толқын. Жұмыс толық көлемде орындалмаған. Бірақ, соған қарамастан автожолды пайдалануға беру актілері қол қойылған.
2024 жылдың қазан айында қабылдап алынған!!!
Сол сияқты Кіндікті ауылына баратын жолдың бюджеті 342 миллион! Асфальт битумға ең аз шығын жұмсалып төселген, қолданылған битум сапасы төмен. Соның салдарынан жол жабыны бұзылып, жол-көлік оқиғаларының туындау қаупі бар.
2023 жылы қабылдап алған бұл жолға 2024 жылы орташа жөндеуге 630 миллион бөлген! Бірақ, алдыңғы мәселе сол қалпында басы ашық күйінде қалған!
Ақсуат-Ойшілік арасындағы тасжолды қабылдап алу мерзімі 1 қыркүйек. Ал, жол әлі сол шаңы шығып жатқан қалпында.
Құмгөлдің тұсындағы көпірді салуға 900 миллион бөлінген. Он екіде бір нұсқасы жоқ көпірдің биыл қалай 200 миллионын игеріп жіберген? Түсінсем бұйырмасын.
Ақсуатта қазір кәріз жүйесі (канализация) тартылуда. Күзде қабылдап алады.
Оған қанша миллиард бөлінгені белгісіз. Халық істеліп жатқан жұмыстарға наразы! Жұмысты орындаушы шымкенттік фирма. 3 үйге канализация тартса, 5 үйге тартпай тастап кетуде.
Неге деген сұраққа уровень шықпайды деп жауап береді. Сонда насосный станция қайда? Бұлар жаман суды уровеньмен ағызбақшы ма?
"Ақсуат-Тазалыққа" алынған жол жөндеуге арналған техникалар қайда? Оны аудан қаншалықты пайдалануда? Бұл техникаларды қанша ақшаға сатып алды?
Былтыр ауданда жоқ қарды күреуге 68 миллион бөлген. Бұл аз ба көп пе өздеріңіз шамалай беріңіздер.
Айта берсе мәселе көп. Сондықтан елдің шетіндегі, желдің өтіндегі ауданға бір назар салсаңыз. Көрсетілген заңсыздықтарды жан жақты тексеріп, шара қолдануыңызды сұраймыз!"деп жазды Оңғар Қабден.
