Атырауда өткен мектеп бітіру кештерінен түсірілген видеолар әлеуметтік желілерде жарияланғаннан кейін мобилографтар мен танымал пабликтердің әкімшілері күтпеген өтініштер ала бастаған деп жазады Democrat.kz.
Олардың айтуынша, жарияланған материалдарды өшіруді сұраған хабарламалар білім саласының өкілдерінен түскен. Бұған осыған дейін ресми түрде тыйым салынған іс-шаралардың кадрларының кең таралуы себеп болған.
Редакцияның қолына басқарма қызметкерлері мен мектеп өкілдерінің атынан жолданған хаттардың скриншоттары түсті. Хабарламаларда түлектер қатысқан видеоларды әлеуметтік желілерден алып тастау туралы өтініштер айтылған.
Мобилографтардың бірінің сөзінше, жарияланған ролик көпшілік назарына іліккеннен кейін оған бірден хабарласа бастаған.
«Түлектер жиналып, түсірілген видео әлеуметтік желілерге тарап кетті. Қазір оны көп адам көріп, бір-біріне жіберіп жатыр. Алдын алу мақсатында жарияланымды өшіруді сұраймыз», – делінген хаттардың бірінде.
Алайда редакция тілдескен кейбір контент авторлары бұл тек өтінішпен шектелмегенін айтады. Олардың сөзінше, видеоларды өшіруден бас тартқаннан кейін телефон арқылы хабарласып, материалдарды ашық қолжетімділіктен алып тастауға көндіруге тырысқан.
Еске салайық, биыл Оқу-ағарту министрлігі мен жергілікті білім басқармалары мектеп бітіру іс-шараларына қойылатын талаптарды күшейткен болатын. Атап айтқанда, банкеттер өткізуге, автокортеж ұйымдастыруға, жаппай серуендеуге және ата-аналарға қосымша шығын түсіретін басқа да салтанатты шараларға тыйым салынған.
Соған қарамастан әлеуметтік желілерде Атыраудағы мейрамханаларда, банкет залдарында және көшпелі форматта өткен түлектер кештерінің видеолары әлі де жарияланып жатыр.
"Редакция бұл мәселеге қатысты Атырау облыстық білім басқармасына ресми сауал жолдады"деп жазады "АқЖайық" басылымы.
