Танымал ұстаз, білім саласының білікті маманы Мира Барказатқызыжаңа оқу жылының алдындағы әрбір ата-ананы толғандыратын сұраққа тоқталып, еліміздегі мектептердегі түйіні тарқатылмаған үлкен проблемаға қатысты өз пікірін білдірді деп жазады Democrat.kz.
"Көп ата-ана жақсы мектеп іздейді. Бірақ қалай табатынын білмейді. Мектеп көп, сұрасаң, бәрі жақсы. Ендеше несіне сандалып жақсы мектеп іздеп жүреміз?!
Біз жүргізіп отырған білім беру саясаты, белгіленген Стандарт, оқытып жүрген бағдарлама жақсы мектеп қалыптастырды ма?! Тіліміздің ұшына НЗМ, БИЛ мектептері келетіні рас.
Ал еліміздегі сансыз мектеп, тіпті жаңадан ашылып жатқан ЖАЙЛЫ МЕКТЕП жақсы мектеп сипатын толық бере алмайтыны рас.
Себебі, біз оқытып отырған әр мектепте сыныптағы оқушы саны 30-дан асып жатады (Ал шағын комплектілі ауылдық мектептерде оқушы аз, маман жетпей жатады). Қайшылық көп.Бағдарлама бойынша әр сыныпта 15-16 оқушы болуы керек, ал білім стандарты сыныптағы оқушы саны 25-тен кем болмауын талап етеді. Сондықтан ірі қалаларда сыныпта 30-40 оқушы отырады. Ал қолданып отырған бағдарлама барлық пән бойынша сыныптағы оқушының 15-16-дан аспауын талап етеді. Бағдарламаны жасаған Кембридж иниститутының зерттеуі солай талап қояды. Себебі әр оқушының білімді меңгеруіне қолайлы жағдай жасалуы керек. Біздің елде дәл осы басты критерий еленбей келеді. Әр оқушының бөлімді оқып бітірген соң қалай меңгергенін анықтайтын БЖБ , әр оқушының тоқсанды аяқтағандағы үйренгенін сараптайтын ТЖБ сол сыныптағы 15-16 оқушының білімін бағалауға арналады. Ал біздер, қалада БЖБ-ны бөлімді аяқтаған 150- 200 оқушыдан аламыз, тоқсандық жиынтық бағалауды да соншама оқушыдан аламыз. Оны сараптауға жұмсайтын уақыты тағы бар. Ал НЗМ мен БИЛ мектептері таңдаулы оқушымен жұмыс жасайды, сыныптағы оқушы саны 16-дан аспайды. Мемлекеттік орта мектептегі білім беруді дұрыс жүйелемегендіктен оқушының білім деңгейі төмен болмағанда қайтеді?!
Бір мұғалім орташа өмір сүруі үшін 24 сағатпен жұмыс жасауы керек. Ал оның оқушы саны 250-300-ге дейін барады. Бастауыш сыныпта төрт -бес пәннен 18 сағат ала отырып 30-32 оқушыдан әр он күн сайын БЖБ алынады.
Ал осы еңбегіне төленетін дәптер тексеру құны 10-12 мың теңгеден аспайды. Одан бөлек әр пәннің жұмыс дәптері тексеріледі, мұғалімнің бұл еңбегі де сол 10-12 мың теңгенің ішінде есептеледі. Бұл жердегі назар аударатын жағдай мұғалім оқушының жұмысын шынайы бағалап сараптай ала ма?! Сараптай алмайды. Уақыты жетпейді. Оны түзеу үшін сыныптағы оқушы саны 15-16-дан аспауы керек!
Ал біздегі бұйрық бойынша сыныпта 25 оқушыдан кем болса, ақы толық төленбейді. Бұл, меніңше, баланың білім алуына қарсы бұйрық және мұғалімнің еңбегін қанайтын бұйрық.
Оқу-ағарту министрінің соңғы ақпараты бойынша бастауыштан БЖБ/ ТЖБ алынып тасталады. Сонда бағдарламаның шиыршығы үзіліп, баланың білім алу дағдысы дамуын тоқтатады немесе орта жолдан басталады (бірақ олай емес екенін біліп отырыздар)
Бастауыш пен орта буын арасындағы білімді бағалау мен жүйелеу бір-біріне сәйкес келмейді. Мұны ескерген кім бар?! Алдыңғы сәйкессіздіктен арыла алмай жүргенде, біртүрлі қисынсыз шешім. Үзілген шиыршықтың орта жолдан бастау қиындығын мұғалімдер шешуге әзір ме?! Оны ойлаған кім бар? Әрі ол қанша уақытқа созылар екен…", - дейді Мира Барказатқызы.
