Журналист, қоғам белсендісі Ләззат Асанова Түркістан облысы, Қазығұрт ауданындағы мектептің бірінде болып жатқан заңсыздық туралы жазба жариялады деп жазады Democrat.kz.
“Соңғы күндері Қазығұрт ауданы Қ.Сәтпаев атындағы мектеп лицейінің ата-аналар чаттарында таратылған бірдей мазмұндағы хабарлама жұртшылықты елең еткізді.
Онда мектеп әкімшілігі тәртіп бұзған немесе сабақтан себепсіз қалған оқушыларды қоғамдық жұмысқа жегуді – “тәрбиелік әдіс” ретінде ұсынған.
Тізім нақты: фойе тазалау, сынып ішін жуу, мектеп ауласында тазалық жұмыстарына қатыстыру, кітапхана мен архивті реттеу…
Бұл орта ғасыр ма, әлде ХХІ ғасырдағы Қазақстан мектебі ме?
Баланы қоғамдық жұмысқа салу – заңсыз!!!
ҚР «Білім туралы» заңы, Бала құқықтары туралы халықаралық конвенция, ҚР Еңбек кодексі – бәрі кәмелетке толмаған баланы мәжбүрлі еңбекке тартуға қатаң тыйым салады.
Ал Сәтпаев лицейінде бұл әрекет тәрбиелік әдіс ретінде ашық насихатталып отыр.
Мектеп директоры Сүйеубек Спабек мырза, осы “әдісті” қай нормативтік актіден алдыңыз?
Мектеп – жазалау орны емес, білім мен қауіпсіздіктің кеңістігі емес пе?
Тәртіп бұзған оқушыны бала еңбегімен жазалау – қорлау
Баланы “ұрлық жасадың – еден жу”, “кешіктің – аула сыпыр” деген түсінікке үйрету:
• тұлғалық дамуына зиян келтіреді;
• өзін кем сезінуге итермелейді;
• оның еңбекке деген көзқарасын бұрмалайды;
• құқықтық мәдениетке қайшы.
Бұл – тәрбие емес, мәжбүрлеу мен қорлаудың элементі.
“Ата-аналарды міндетін еске салу үшін шақыру” – қорқыту ма?
Хабарламада ата-анасы келмейтін оқушылардың ата-анасын мектепке “міндетін еске салу үшін шақыру” керектігі айтылады.
Бұл — әкімшілік тіліндегі жазалау риторикасы. Мектеп ата-анамен әріптестік орнатуы тиіс, “міндетін еске салу” деген сөз — педагогикалық этикаға мүлде жат.
Бір мәтіннің бірнеше сыныпқа таралуы – жүйелі тапсырма бар екенін көрсетеді
Скриншоттардан байқағанымыз:
• Бірдей мәтін 9Ж, 9Д және басқа сыныптарға таралған;
• Бұл жекелеген сынып жетекшісінің ойлап тапқаны емес,
• Мектеп әкімшілігінің, не директор Спабек мырзаның бастамасымен тараған бұйрықтық сипаттағы ақпарат.
Егер мектепте тәртіп осындай тәсілмен реттелетін болса, онда бұл – педагогикалық дағдарыс.
Мектеп – бала еңбегінің арзан күші емес
Тәрбиенің орны – сабақ, сынып сағаты, психологиялық қолдау, қосымша бағдарлама.
Ал баланың қолына сыпырғыш беріп, “тәрбиелеу” – бұл тек жалқау әкімшілік тәжірибесі.
Мұндай тәсілдер бұрын мектептерде кең тарағанымен, бүгінде толық тоқтатылған.
Бірақ Сәтпаев лицейі болса, әлі “кеңестік еңбек тәрбиесін” жаңғыртқысы келеді.
Бұл жайт бойынша аудандық Білім бөлімі қандай шара қолданады?
Қоғамның сұрағы заңды:
• Мұндай нұсқаулықты кім дайындады?
• Директор Сүйеубек Спабек мырза бұған жауап бере ме?
• Аудандық білім бөлімі бұл әрекетті заңды деп санай ма?
• Балаларды еңбекке мәжбүрлеу фактісі бойынша тексеру жүргізіле ме?
Баланың құқығын бұзу – ең ауыр педагогикалық қателік
Әрбір ата-ана, әрбір мұғалім, әрбір басшы есте сақтау керек: Бала – жазаланатын объект емес. Бала – мемлекет қорғауындағы тұлға.
Сәтпаев лицейінде тараған бұл ұсыныс – оқу ордасының беделіне нұқсан келтіреді және шұғыл тоқтатылуы тиіс"деп жазды Ләззат Асанова.
