Қазақстанның вице-президенті қызметіне тағайындалған Ерлан Қарин көпшілікке саясаттанушы әрі мемлекеттік қызметкер ретінде жақсы таныс. Алайда оның туған жері, отбасы мен қызметтен тыс өмірі туралы деректер көп айтыла бермейді деп жазады Democrat.kz.
Ерлан Тынымбайұлы Қарин 1976 жылғы 26 мамырда қазіргі Түркістан облысы Сайрам ауданының Ақсу ауылында дүниеге келген. Кейін Ақтөбеде білім алып, еңбек жолын мектепте тарих және география пәндерінің мұғалімі ретінде бастаған.
Ашық өмірбаяндық мәліметтерге сәйкес, әкесі – Тынымбай Төлепбайұлы, анасы – Несіпкүл Бадаубекқызы. Отбасында төрт бала өскен. Ерлан Қариннің екі ағасы мен бір қарындасы бар.
Ерлан Қарин – алты баланың әкесі, деп жазады Democrat.kz. Жұбайының есімі – Зүлфия Дидахметқызы. Ерлі-зайыптылардың бес қызы және бір ұлы бар. Үлкен қызы Айжан 2001 жылы, Амина 2002 жылы, ұлы Бекназар 2005 жылы, қызы Зере 2010 жылы туған. Ал 2016 жылы отбасында Мариям және Сафия есімді егіз қыздар дүниеге келген.
Қариннің өзі отбасы туралы сирек айтқанымен, 2017 жылы көпбалалы әкелер туралы сұхбатта жұмыс қанша қауырт болса да, бос уақытын балаларымен өткізуге тырысатынын айтқан.
Ол ресми немесе зайырлы іс-шараға бару мен отбасымен бірге кеш өткізудің бірін таңдау керек болса, отбасын таңдайтынын жеткізген. Әсіресе қыздарының әкесіне жақын екенін айтып, олардың күндіз де «Қашан келесің?», «Жұмыстан шықтың ба?» деп хабарласып тұратынын әңгімелеген.
Қарин балалар тәрбиесінде тарихқа да ерекше мән берген. Бұрынғы бір сұхбатында балаларына Кенесары хан туралы жиі әңгімелейтінін, тіпті Кенесарыға қатысты жәдігерді көрсету үшін оларды Шымкенттегі музейге арнайы ертіп барғанын айтқан. Оның сөзінше, өзінің де ұлттық дүниетанымының қалыптасуына әжесінің әңгімелері мен бала кезінде үйінде үнемі қосылып тұратын Қазақ радиосы әсер еткен.
Қызметтік өмірінде саясат, қауіпсіздік, мемлекеттік идеология секілді күрделі салалардың ортасында жүрген Ерлан Қарин жеке өмірін көпшілік алдына көп шығара бермейді. Ашық деректерден байқалатыны – ол үшін отбасы мен бала тәрбиесі қоғамдық қызметтен бөлек тұрған маңызды әлем болып қалған.
