Астанада «Жаңа адамдар» қозғалысының белсенділері ғаламтор арқылы 13 жасар қыздың сеніміне кіріп, онымен оңаша кездеспек болған 1997 жылғы педофилді әшкерелеп, құқық қорғау органдарына тапсырды, деп хабарлайды Democrat.kz.
Бір жыл ішінде 124 азаматтық науқанын өткізген ұйым өкілдері кәмелетке толмағандармен байланыс орнатпақ болған қаскөйлерді басты қаруы саналатын анонимділіктен айыру арқылы олардың тұрақты мінез-құлық үлгілерін анықтаған.
Белсенділердің сөзінше мұндай адамдар алдымен баланың сеніміне кіруге тырысып, өз әрекеттерін жасыру үшін түрлі айла-тәсілдерге барады және виртуалды байланыстан шынайы өмірдегі кездесулерге тез көшуге ұмтылады.
Осы мінез-құлық үлгісін растау мақсатында қоғам белсенділері 13 жасар қыздың жалған парақшасын ашып, арнайы эксперимент жүргізген кезде Тотан Илесбек есімді жігіт бірден табандылық танытып, мақтау сөздер жазу арқылы жасөспірімді кинорумда кездесуге көндірген.
Алайда белгіленген орынға қыздың орнына ұйым мүшелері барып, барлық хабарламалар мен дәлелдемелерді көрсеткен сәтте күдікті өз қатесін тез мойындауға мәжбүр болды.
Ер адамнан мұндай қылмысты қалай бағалайтынын сұраған кезде ол барлығы заң аясында шешілуі керек деп жауап бергенімен, іс өзіне келгенде жеңілдік жасауды өтінген.
«Толықтай заң бойынша», - деді ұсталған азамат.
Алайда заң мен тәртіптің бәріне ортақ екенін ескерткен қоғам белсенділері оны жиналған барлық айғақтармен бірге полиция қызметкерлеріне тапсырды.
Ұйым мүшелері балалардың қауіпсіздігі тек полиция немесе ата-ананың ғана емес, бүкіл қоғамның жауапкершілігі екенін айтып, әрбір адамның азаматтық қырағылығы талай қайғының алдын алатынын еске салды.
Бұған дейін айналасындағы балаларға көмектескен тұрғындардың мысалдары аз емес, мәселен Астанада Қазыбек есімді такси жүргізушісі кішкентай қыз бен ер адамның туыс екеніне көз жеткізбейінше оларды діттеген жеріне апарудан бас тартса, Алматы облысында Тимур есімді азамат сегіз жасар қызды сүйреп әкетпек болған күдіктінің әрекетіне араласып, баланы құтқарып қалған.
Осындай оқиғаларды мысалға келтірген белсенділер барлық азаматтарды барынша сақ болуға, балалармен ашық сөйлесуге және оларға ғаламтордағы қауіптерді түсіндіріп отыруға шақырды.
Тек осылай ғана қауіпті азайтып, балалардың қауіпсіздігі ортақ басымдыққа айналатын қоғам құруға болады.
