«Долфин» тайфуны Жапонияның Окинава аралдарын соғып, алты адамды жарақаттады және ондаған мың ғимаратты электрсіз қалдырды. Енді дауыл Қытайдың шығыс жағалауына қарай жылжып, Чжэцзянда порттар, мектептер, туристік орындар мен паромдар жабылды деп хабарлайды Democrat.kz.
8 тамыз кешіндегі Жапония метеорологиялық агенттігінің ресми дерегінде Dolphin «ірі әрі өте күшті тайфун» ретінде көрсетілді: орталық қысымы 945 гектопаскаль, тұрақты желі секундына 45 метр шамасында болған.
Reuters мәліметінше, Окинава мен Кагосимада алты адам жарақат алды. Кагосимада шамамен 39 мың, Окинавада 12 мыңнан астам ғимарат жарықсыз қалды. ANA мен Japan Airlines бірқатар рейсті тоқтатты. Тайфунның тұрақты желі сағатына 162 шақырым, екпіні 216 шақырымға жеткен.
Қытай билігі дауылға байланысты төтенше ден қою деңгейін көтерді. Чжэцзянда теңіз порттарының жұмысы тоқтап, Нинбо әуежайының рейстері үзілді. AP дерегінше, Нинбо маңында 800-ге жуық кеме порттарға кіргізілген, туристік орындар жабылып, мектептерге демалыс күндері де жұмыс істемеу бұйырылған. Кей аудандарда бірнеше күнде 200–400 миллиметр жауын түсуі мүмкін.
Қытай Су ресурстары министрлігі Шанхай, Цзянсу, Чжэцзян, Аньхой, Фуцзянь және Цзянси өңірлерінде су тасқынына қарсы төтенше режим енгізген.
Тайфун саяси дауға да айналды
Қытай дауыл кезінде Тайвань бұғазындағы кемелерге қозғалысты шектеу жөнінде нұсқаулық таратқан. Тайбэй мұны халықаралық навигация еркіндігіне араласу деп бағалап, қытайлық бұйрықты «ақылға қонымсыз» деп атады.
