Ақмола облысының полициясы бұрынғы жұмыс орнынан клиенттердің деректер базасын алып кеткен 33 жастағы ер адамды алаяқтық жасады деген күдікпен тексеріп жатыр. Ол адамдарға «iPhone ұтып алдыңыз» деп хабарласып, сыйлықты алу үшін 55 мың теңге төлеуді ұсынған, деп жазады Democrat.kz.
Полиция мәліметінше, күдікті бұған дейін тауар сатумен және жеткізумен айналысатын компанияда жұмыс істеген.
Жұмыстан кеткеннен кейін ол компанияның клиенттік базасын иемденіп, бұрын сол фирманың қызметін пайдаланған адамдарға хабарласа бастаған.
Азаматтарға олардың ұтыс ойынында iPhone жеңіп алғанын айтқан.
Алайда телефонды алу үшін 55 мың теңге төлеу керектігін түсіндірген. Ақша аударылғаннан кейін ешқандай смартфон жеткізілмеген.
Қазір полиция кемінде екі жәбірленушіні анықтады: олардың бірі Ақмола облысының Бурабай ауданында, екіншісі Алматы облысында тұрады.
Тергеушілер күдіктінің басқа да осыған ұқсас эпизодтарға қатысын тексеріп жатыр.
