Бұрынғы Оқу ағарту министрлігінің өкілі Ернұр Дәуенов әлеуметтік желі парақшасында көпшілікке арнап, жазба жариялады деп жазады Democrat.kz.
"Мектеп директорлары мен орынбасарларының назарына!
Қайырлы күн, әріптестер!
Министрліктен кеткеніме 1 жылға жуық уақыт өтсе де, әлі кейбір алаяқтар менің аты-жөнімді пайдалануын тоқтатар емес.
Алаяқтықтың түрі – жалған «Цифрлы Қазақстан” жобасына сынып жетекшілерді, ата-аналарды зумм және чаттар арқылы қосып, жеңілдіктер жасап, төлемақы сұрайды.
Сол хаттың негізінде ата-аналар чатына қосып жүрген директорлар мен орынбасарлар да жоқ емес, зардап шеккен ата-аналар да бар.
Әріптестер, кез келген хатты мұқият оқу керек, мазмұнына назар аудару керек, қойылған мөрдің жалғаны бірден көрінеді.
Осыған байланысты келесіні мәлімдеймін:
Мен аталған қызметте жұмыс атқармаймын.Менің атымнан жолданған қандай да бір тапсырмалар, қаржылық немесе ұйымдастырушылық сипаттағы өтініштер жалған.Мұндай хабарламалар алаяқтық әрекет болып табылады.
Өз тарапымнан Ішкі істер министрлігіне, Бас прокуратураға арыз хаттарды жолдадым.
Әріптестер, таныс мектеп басшылары мен орынбасарларыңыз болса, бұл ақпаратты жолдауды сұраймын" деп жазды Ернұр Дәуенов.
