Белсенді ұстаз Айнұр Сабыр мектептегі келеңсіз жағдайларға, буллингтерге қатысты өзінің пікірін білдірді деп жазады Democrat.kz.
"Соңғы кезде мектептерде келеңсіз жағдайлар көп болып кетті. Ал соңында құқық бұзған оқушылардың ата-анасын айыппұл төлеумен шектеп, мектеп басшысын жұмыстан шығарумен тоқтайды.
Ол маманның оқыған-тоқыған еңбегін бір жағдаймен жоқ қыла саламыз... Солай еткен сайын мектептегі әлгі жағдайлар көбеймесе, азайып жатқан жоқ. Әрине, көптеген ата-ана қит етсе "Мектеп жауап берсін! Не қарап отыр" деп, баланың көзінше сөйлеп, кері тәрбие беріп отырса...
Бұны құлағымызбен де естіп жүрміз.
Егер сондай жағдайда, керісінше, мектеп басшысына айыппұл салып, ата-ананы "Үйіңде отырып, балаңды тәрбиеле" деп жұмыстан шығарса, мүмкін баласына ақыл кірер, а?..
Мүмкін өрекпіген ата-ана баласына "Тек жүр! Сенің кесіріңнен менің жұмыстан қуылатын жайым жоқ" деп, күнде құлағына құяр... Әрине, бұл менің жай ойым ғой. Қайткен күнде де мына кері кетіп бара жатқандарды қалай жөнге саламыз?
Әлде бұл да осылай болуы керек өтпелі кезең бе? Миллиардтарға жасалып жатқан жобалардың сұрауын мұғалімдерден сұрап, қыспақтай бергенмен жағдай оңалып жатқан жоқ қой бәрібір?!", дейді Айнұр Сабыр.
