Әнші Меруерт Түсіпбаева елдегі тасжолдардың бойындағы дәретханалардың жай-күйіне назар аударуға шақырды. Өнер иесі әлеуметтік желідегі парақшасында Парламентке кім депутат болып барса да, халық күнделікті кездесетін осы мәселені шешсе екен деген тілегін білдірді деп жазады Democrat.kz.
Әншінің айтуынша, елді мекендер арасындағы ұзақ сапар кезінде жолаушыларға қолайлы әрі таза дәретхана табу әлі де қиын. Әсіресе әйелдер, балалар, егде жастағы адамдар мен денсаулығында кінәраты бар жолаушылар үшін бұл жай ғана тұрмыстық қолайсыздық емес, маңызды әлеуметтік мәселе.
«Парламентке кім депутат болса да, трасса бойындағы дәретхана мәселесін шешсе екен», – деген мазмұнда жазба қалдырған өнер иесі халық қалаулыларының назарын қарапайым жұрттың күнделікті қажеттілігіне аударды.
Шынында да, республикалық және өңірлік маңызы бар тасжолдардың бойындағы санитарлық нысандардың жағдайы бұған дейін де бірнеше рет сынға алынған. Кейбір бағыттарда дәретхана мүлде жоқ болса, бар нысандардың тазалығы, суы, жарығы мен қауіпсіздігі талапқа сай келе бермейді.
Бұл мәселе тек жол мәдениетіне ғана емес, туризмнің дамуына және елдің сырттан келген қонақтар алдындағы беделіне де тікелей әсер етеді. Заманауи жол инфрақұрылымы тек тегіс асфальтпен шектелмей, жолаушыға қажет тұрақ, тамақтану орны, дәретхана және қауіпсіз демалыс алаңдарымен толықтырылуға тиіс.
Меруерт Түсіпбаеваның жазбасы әлеуметтік желі қолданушылары арасында қолдау тапты. Пікір білдірушілер бұл мәселенің жылдар бойы айтылғанымен, әлі күнге дейін түбегейлі шешілмегенін жазуда.
