Министр мүфтимен кездесті: Ғылым діннен ақыл сұраған ба?

20 қаңтар 2025

829

Министр мүфтимен кездесті: Ғылым діннен ақыл сұраған ба?

Денсаулық сақтау министрі Ақмарал Әлназарова Қазақстан мұсылмандары діни басқармасының төрағасы, Қазақстанның Бас мүфти Наурызбай қажы Тағанұлымен кездесу өткізді деп жазады Democrat.kz. тілшісі министрліктің ресми ақпаратына сілтеме жасап. Кездесудің негізгі тақырыбы вакцинациялау және ағза донорлығы мәселелері бойынша халықтың хабардарлығын арттыру мәселелері болған.

Әңгімелесу барысында Денсаулық сақтау министрі вакцинациялау еліміздің денсаулық сақтау саласындағы басым бағыттардың бірі болып табылатынын атап өтті. Алайда, соңғы жылдары Қазақстанда да, бүкіл әлемде де екпе алудан бас тарту үрдісі өсуде, бұл иммунизацияланбаған адамдар санының артуына және егілмеген азаматтардың арасында инфекциялық аурулардың өршуін тіркеуге ықпал етеді.

«Инфекциялық аурулардан және олардың ықтимал зардаптарынан қорғайтын профилактикалық екпелерден бас тарту - балалардың денсаулығына қауіп төндіреді», — деп атап өтті Ақмарал Әлназарова. Министр сонымен қатар вакцинациядан бас тартудың басты себептерінің бірі ата-аналардың діни сенімдерінің әсері екенін атап өтті. Осыған байланысты Қазақстанның Денсаулық сақтау министрлігі Қазақстан мұсылмандары діни басқармасымен (ҚМДБ) ынтымақтастықты күшейтуді жоспарлап отыр. Осы ынтымақтастық шеңберінде Дүниежүзілік денсаулық сақтау ұйымының қолдауымен вакцинациялаудан бас тартуға әсер ететін діни факторларды анықтау, сондай-ақ байланыс олқылықтарын және вакцинациялауға кедергі келтіретін басқа да ықтимал факторларды зерделеу үшін зерттеу жүргізіледі, деп жазылған министрлік таратқан ақпаратта. Алайда осы ақпараттың фотолары мен медицина деп аталатын ғылымның діни мекемеде кездесуі көпшіліктің көкейіне түрлі ой салды. Бастарына орамал тартқан Денсаулық сақтау министрі мен министрлік өкілдерінің әрекетін жұрт түсінбей әлек. Зайырлы мемлекет саналатын Қазақстан Республикасының білдей министрінің дін адамы секілді басына орамал таққанын сынға алғандар болды. Ал ең бастысы, "діни түсінікке байланысты вакцина алудан бас тарту" дейтін министрдің пікірін көпшілік қолдамады. Бұл ақпаратқа қатысты "Вакцинаның кері әсері, денсаулыққа тигізер зияны болмаса, ешкім бас тартпас еді", "екпеден бас тартуға ешқандай да діни сенімнің қатысы жоқ", "ғылым діннен ақыл сұраған ба?" дейтін пікірлер жазылуда. Фото әлеуметтік желіден.