Ардагер ұстаз, білім саласының майталман маманы Мира Барказатқызы соңғы уақытта қызу талқыланып жатқан мектептегі "ҚМЖ" сынды бітпейтін құжаттар мен бала тәрбиесіне қатысты өткір пікір білдірді деп жазады Democrat.kz.
"Мұғалімге қырық құрау мектеп көрмегендердің жасаған бағдарламаларын тықпалап, қажеті де пайдасы да жоқ жұмыс жасатуды қою керек.
Әр мұғалім өз оқушысының деңгейіне қарай, өзі дидактикалық материал жасағаны жөн. ҚМЖ-ны мұғалім өзі үшін жасайды, біреудің жасаған ҚМЖ-сы қол болмайды. Оны білмегендер ҚМЖ-ны талдап қарқ болмай-ақ қойсын!
Мұғалімде бірнеше сырқаттың түрі: грыжа, остехандроз, артрит аурулары бар. Оның себебі бір отырса сабаққа әзірленіп, түн жарымына дейін отырады, бұл аурулар содан пайда болады. Оған бағанағы мектеп көрмегендердің қисынсыз бағдарламасы бойынша тәрбие жұмысын жүргізгендігі жөнінде есеп жасайды. Босқа өлген уақыт оның бәрі.
Ешқайсысы оқушы тәрбиесі үшін тиімді емес, есеп үшін жасалады. Егер Жұлдыз Сүлейменова, мұғалімнің 16 сағатына 16 сағат төлесе, сонда ғана мұғалімнің жағдайы да, шығармашылығы да, сабағының сапасы да, тұрмысы да, денсаулығы да түзеледі.
Тәрбие жұмысын пән мұғалімдерінен алу керек, оны кураторлар атқарсын! Әр мұғалімге лаборант белгіленсін, олар мұғалім үшін ҚМЖ және дидактикасын жасайды.
Міне, сапалы іс үшін, оқушы дұрыс білім алып, мұғалім өз сабағының нәтижесін көру үшін жасалатын дүниелер осындай болу керек!"дейді Мира Барказатқызы.
