Қазақстанның салық органдары картаға түскен кез келген ақша табыс болып саналмайтынын қайта түсіндірді. Туыстардан келген ақша, сыйлық және жеке мақсаттағы мобильді аударымдарға салық салынбайды, деп жазады Democrat.kz.
Мемлекеттік кірістер органдарының түсіндіруінше, бақылаудың мақсаты — азаматтардың күнделікті бір-біріне жіберетін ақшасын тексеру емес.
Негізгі назар жеке банк шотын тауар немесе қызмет үшін тұрақты түрде төлем қабылдауға пайдаланатын тіркелмеген кәсіпкерлерге аударылады.
Егер картаға түсетін қаражат жүйелі сипатта болып, нақты тауар, жұмыс немесе қызмет үшін төлем екені анықталса, ол кәсіпкерлік табыс ретінде қарастырылуы мүмкін.
Ал достар мен туыстар арасындағы аударым, қарызды қайтару, сыйлық немесе материалдық көмек өздігінен салық салынатын табыс болып есептелмейді.
Салық органдары кәсіпкерлікпен тұрақты айналысатын азаматтарға төлемдерді жеке картаға емес, бизнеске арналған шоттарға қабылдауды ұсынады.
Тіркелмей кәсіпкерлікпен айналысу әкімшілік жауапкершілікке әкелуі мүмкін.
