Шымкенттегі №84 мектептің 11-сынып оқушыларының бітіру кеші бітпес даумен аяқталыпты деп жазады Democrat.kz.
"Шымкенттегі №84 мектептің 11-сынып оқушыларының бітіру кеші «Мейман ата» мейрамханасында дүркіреп өтті. Ән, би, тост, тілек – бәрі жоғары деңгейде ұйымдастырылған. Бірақ ең “қызығы” – кештен кейін басталды.
Сөйтсе, кештің барлық шығынын өтеу үшін ата-аналардан жиналған қомақты қаражат мейрамханаға жетпеген. Кәсіпкер ақшаны күтіп отыр, ал ақша… жоқ!
Көп ұзамай, барлық көз күдіктенген жайт расталды: қаражатты бір мұғалім жинап алған.
Бірақ оны қайда, неге жұмсағаны, нақты қандай мақсатта пайдаланғаны әлі күнге дейін белгісіз. Есеп те жоқ, ресми түсініктеме де берілмеген.
Жағдай ушыға бастағанда, мейрамхана иесі құзырлы органдарға шағым түсірген.
Алайда құқық қорғау органдары бұл әрекеттен қылмыстық құрам табылмағанын айтып, істі “екі жақты келісім” – яғни сөз байласу арқылы болған азаматтық сипаттағы дау ретінде тіркеген дейді. Салдарынан ешқандай құқықтық шара қолданылмай, іс тоқтатылған екен.
Моральдық, этикалық, педагогикалық тұрғыда не айтуға болады?
Мұндай жағдайда қоғам, ата-ана, оқушы – бәрі де сескенеді. Өйткені, мұғалім – тәрбиеші, үлгі болар тұлға емес пе еді? Ал сеніп тапсырған қаражатты өз бетінше иемденіп, есеп бермей, бұлтартушылық танытқан адамға қандай баға береміз?
Оқушылар сол кеште мектеппен қоштасып, жаңа өмірге қадам басты. Ал мұғалім ше?
Енді қоғамның көкейіндегі сұрақтар:
Ар қайда?
Намыс қайда?
Ұят ше?
Педагогтың абыройы, статусы қай деңгейде қалды?
Заң жазаламаса да, ар жазалай ма?
Мұндай әрекет – қоғамдағы педагог мамандығының қадірін кетіреді.
Тек заңмен емес, моральмен өлшенетін тұстар да болады. Бұл оқиға – соның айқын көрінісі.
Қоғам бұл үнсіздікті кешірмейді. Ал сіз ше?
Дұрыс тағайындалмаған кадр қоғамның құлдырауына әкеліп соғады.
“Сенген қойым сен болсаң, күйсегеніңе болайын” деген осы шығар…" деген жазбаны өз парақшасында жариялаған Әділ Еділбай бұл ақпараттың Aida Maratkyzyның парақшасынан алынғанын айтады.
