Астанадағы Назарбаев Зияткерлік мектептері мектебінің бұрынғы оқушысының ата-анасы құқық қорғау органдарына жүгініп, ұлдарының ұзақ уақыт бойы буллингке ұшырағанын мәлімдеді деп жазады Democrat.kz.
Жасөспірімнің анасының айтуынша, ұлы НЗМ-ге грант негізінде түсіп, мектеп өміріне белсенді қатысқан және сынып старостасы болған. Алайда сегізінші сыныпта оқып жүргенде сыныптастары күтпеген жерден оған бойкот жариялаған.
Әйелдің сөзінше, оқушылар онымен сөйлеспей қойған, асханада қасынан қашқақтаған, бір партада отырғысы келмеген. Тіпті достары да басқа оқушылардың көзінше онымен қарым-қатынасты үзген.
Ата-аналар бірнеше рет сынып жетекшісіне және мектеп психологына жүгінгендерін, бірақ жағдай өзгермегенін айтады. Соның салдарынан жасөспірімде ауыр психологиялық дағдарыс белгілері пайда болған: ашу-ыза ұстамалары, өзіне зиян келтіру әрекеттері (селфхарм) және суицидтік ойлар.
Дәрігерлік тексеруден кейін мамандар баланы шұғыл түрде басқа мектепке ауыстыруды ұсынған. Қазіргі уақытта жасөспірім ем қабылдап жатыр, антидепрессанттар ішеді және мамандардың бақылауында.
Анасының айтуынша, мектеп ауыстырғаннан кейін де ұлының жағдайы ауыр күйінде қалған. Отбасының мәлімдеуінше, жасөспірім тоғызыншы қабаттан секіруге әрекеттенген, бірақ ата-анасы оны дер кезінде тоқтатып қалған.
Осы оқиғадан кейін отбасы полицияға жүгінген. Анасының айтуынша, тергеу әлі жалғасуда, ал қылмыстық іс сәуір айынан бері прокуратураның қарауында жатыр.
Қазіргі кезде жасөспірім психологиялық көмекке мұқтаж болғанымен, бастан өткерген ауыр тәжірибесіне байланысты мамандармен жұмыс істеуден бас тартып отыр.
