Танымал журналист Тоқтар Жақаш "Димаш Олжастың сандырағына бекер араласты" деп өкінішін білдірді деп жазады Democrat.kz.
"Кеше "Димаш Олжастың сандырағына бекер араласты" дегеніме, көпшілік қарсы пікір айтыпты. Бүгін сол ойымды таратып жазсам деп едім.
Жалпы, Димаш - қазақтың бағы мен маңдайына жазған алтын ұл ғой! Оны Олжас сияқты көптеген көбікауыз провокаторлардың әрқайсысына қарсы салып қоюдан ешкім абырой таппайды. Өйткені, Олжас жалғыз емес. Күнде әр бұрыштан шәуілдеген қорқаулардың қайсыбіріне жалғыз Димашты сала береміз?Қазір Димаштың қолында қазақ тілін барлық салада дамытуға бағыттауға болатын орасан зор тетіктер тұр. Димаш әнші ғана емес. Димаш - әлемдік бренд! Димаш - ұлтымыздың дүниежүзі аренасындағы мәдени дипломаты!
Әрине, Димаштың бос уақыты жоқ. Бірақ тұтас командасы бар ғой. Димаштың командасы қазақ тілін көркейте түсу үшін, әлгіндей қағынан жеріген қаратабандардың аузына құм құю үшін көптеген онлайн-жобаларды да қатар жүргізсе - нұр үстіне нұр болар еді!
Небір комикстер, подкасттар, фильмдер мен әндер салынып отырса, қазақ тілінде жаңаша дамыған мәдениет те қалыптасар еді. Одан кейін Димаш қазақ тілінің амбассадоры ретінде "Мәңгілік тіл және мәңгілік ән" деген сияқты жыл сайын музыкалық фестивальдер өткізсе; ол жерде негізінен поп, рэп, джаз, рок, вальс жанрларында тек қазақ тілінде әндер шырқалса, ол әндерді Димаш өзі ғана емес, қазақша айтатын өзіміздің және шетелдік әншілерді де қатыстырса.
Әлуметтік желідегі парақшаларында "Димашпен бірге қазақша сөйлейік" челленджін жиі өткізіп тұрса. Белгілі адамдар мен шетелдік фанаттары қазақша сөйлеп, қазақ ақындарының өлеңін оқып, қазақша әндер айтып, оның мағынасын түсіндіретін болса.
Ұлтты да, тілді де дамытатын тек, мәдениет!
Міне, сонда ғана қазақ тілі қазіргі құрсаудан босап шығып, еркін, тірі әрі жайнаған тілге айналар еді!
Бос айқай, "сам дурак" деген эмоциялық жауаптың мағынасы жоқ әрі өмірі тым қысқа.
Ол ертең-ақ ұмытылып кетеді. Нақты әрекет керек. Мен осыны айтпақ болдым"деп жазды Тоқтар Жақаш.
