Таяуда Оқу ағарту министрі педагогтардың аттестациясындағы жаңа өзгерістерге қатысты мәлімдеме жасаған еді. Танымал белсенді ұстаз Сәния Нүсіпәлі осы мәселеге қатысты өз пікірін білдірді деп жазады Democrat.kz.
“Сөз тіркестер мен сөйлемдерді өзгерту – реформа ма?!”
Білім саласында тағы да “жаңа өзгерістер”, “жаңа жүйе”, “жаңа талаптар” деген сөздер айтылып жатыр. Бірақ мұқият қарасаңыз, өзгергені не?
Қағаздағы “сөз тіркестері мен сөйлемдер ғана.”Кеше “аттестацияның жаңа форматы” болды. Бүгін “жетілдірілген жүйе” дейді. Ертең “жаңартылған тәсіл” деп атайды. Бірақ мұғалімнің өмірінде не өзгерді? Қағаз азайды ма? Есеп қысқарды ма? Сабаққа дайындалуға уақыт көбейді ме?Жоқ.
Шын мәнінде жүйе сол қалпы тұр. Тек “атауы өзгерген ережелер”. “қайта жазылған сөйлемдер” “жаңаша безендірілген құжаттар” ғана пайда болады.
Нағыз реформа — сөзді өзгерту емес.
Нағыз реформа — артық талапты алып тастау.
Нағыз реформа — мұғалімді қағаздан босату.
Нағыз реформа — сабақ сапасына шын мәнінде әсер ету.
Ал бізде көбіне реформа дегеніміз —
бір құжатты алып тастау емес,
сол құжаттың “мәтінін қайта жазу” сияқты.
Сонда сұрақ туындайды:
Сөз тіркестер мен сөйлемдерді өзгерту — реформа ма, әлде жаңылтпаш па?" дейді Сәния Нүсіпәлі.
