«Қазақмыс корпорациясы» ЖШС алдағы онжылдықтарға арналған өндірістік даму бағытын айқындады. Басқарма төрағасының орынбасары Саят Бакировтың төрағалығымен өткен кеңейтілген кеңесте компанияның 2060 жылға дейінгі тау-кен байыту кешенін дамыту стратегиясы қаралды деп жазады Democrat.kz.
Бұл ауқымды стратегиялық жоспар өндірістік инфрақұрылымды жаңғыртуға, тау-кен шахта жабдықтарын жаңартуға және шикізат базасын кеңейтуге бағытталған инвестициялық бағдарламалардың негізі болмақ.
Даму стратегиясының негізгі басымдықтары:
Жезқазған өңірі: Мыс-шикізат қорын толықтыру үшін Қ.И. Сәтбаев атындағы кен орнында геологиялық барлау жұмыстары күшейтіледі. Сондай-ақ «Жыланды» кенішінде өндірістік нысандар салу мен оны жабдықтау жұмыстары жалғаспақ.
Қарағайлы кешені: Қарағайлы байыту фабрикасын шикізатпен тұрақты қамтамасыз ету үшін «Құсмұрын» кен орны игеру ісіне қосымша тартылады.
Нұрқазғанды жаңғырту: Нұрқазған байыту фабрикасының қуаттылығын арттыруға ерекше назар аударылды. 2029 жылға қарай кәсіпорын жылына 4,5 млн тонна шикізат өңдеу деңгейіне шығуы тиіс (қазіргі көрсеткіш – 4 млн тонна).
«Стратегиялық жоспар барланған кен қоры негізінде жасалғанымен, жаңа геологиялық деректер анықталған сайын бағдарламаға тиісті түзетулер енгізіліп отырады», — деп атап өтті Саят Бакиров.
Бұл жоспар компанияның ұзақ мерзімді тұрақтылығын қамтамасыз етіп қана қоймай, мыңдаған жұмыс орнын сақтауға және өндіріс көлемін нығайтуға мүмкіндік береді.
