Соңғы бес жылда Қазақстанда 1120 мектеп салынғанына қарамастан, оқушы орнының тапшылығы толық шешілген жоқ. Оқу-ағарту министрлігінің мәліметінше, ел мектептерінде әлі 245 мың орын жетіспейді. Биыл бірінші сыныпқа шамамен 380 мың бала қабылданбақ деп жазады Democrat.kz.
Жаңа оқу жылы қарсаңында Қазақстандағы мектеп тапшылығы тағы да күн тәртібіне шықты.
Оқу-ағарту вице-министрлері Шынар Ақпарова мен Жайық Шарабасов ел бойынша қазіргі таңда 245 мың оқушы орны жетіспейтінін мәлімдеді.
Бұл мәселенің қайта көтерілуіне Астанадағы ата-аналардың шағымдары түрткі болған. Кейбір отбасылар мамыр айынан бері бірінші сыныпқа баласын тіркеу кезінде таңдаған мектебінен бас тарту жауабын алғанын айтқан.
Шынар Ақпарованың түсіндіруінше, 2026 жылы бірінші сыныпқа қабылдау арнайы электронды платформа арқылы жүргізілген. Алғашқы кезеңде техникалық ақаулар болған, ал кейбір өтініштер құжаттардың дұрыс берілмеуіне байланысты қабылданбаған.
Сонымен қатар мектепте нақты бос орын болмаса, баланы белгілі бір білім ордасына қабылдаудан бас тартуға да мүмкіндік бар. Яғни барлық бас тартудың себебі бірдей емес.
Биыл Қазақстан мектептері шамамен 380 мың бірінші сынып оқушысын қабылдауды жоспарлап отыр. Құжат қабылдау 31 тамызға дейін жалғасады.
Министрлік мәліметіне қарағанда, жағдай бес жыл бұрын бұдан да күрделі болған. 2020 жылы елге шамамен бір миллион оқушы орны жетіспеген. Содан бері 1120 мектеп салынған.
Оның ішінде «Келешек мектептері» жобасы аясында жаңа стандарттағы 217 мектеп пайдалануға берілген. Осы шаралардың арқасында тапшылық төрт есеге жуық қысқарған.
Мемлекет жеке мектептердің мүмкіндігін де пайдаланып отыр. 2026 жылы 749 жекеменшік мектепке мемлекеттік білім беру тапсырысы беріліп, оған шамамен 118 млрд теңге бағытталған. Министрлік бұл тетік оқушы орны тапшылығын, үш ауысымды мектептер мен апатты білім нысандары мәселесін азайтуға қолданылатынын айтады.
Дегенмен 245 мың орын — проблема толық шешілді деуге әлі ерте екенін көрсететін үлкен көрсеткіш. Әсіресе халық саны мен жаңа тұрғын үй құрылысы жылдам өсіп жатқан Астана, Алматы секілді қалаларда сұраныс алдағы жылдары да жоғары болуы ықтимал.
