Қазақстанда міндетті мектеп формасын алып тастау туралы былтыр жарияланған петиция қайтадан жұрт назарын аударып жатыр. GosRating.com платформасындағы өтінішті қазір 182 мыңнан астам адам қолдаған, деп жазады Democrat.kz.
Петицияны Эльмира Асанқызы 2025 жылғы 13 тамызда жариялаған. Автор Қазақстан мектептеріндегі міндетті формадан бас тартып, оның орнына оқушыларға ыңғайлы әрі қолжетімді киім таңдауға мүмкіндік беретін ортақ дресс-код енгізуді ұсынады.
Петиция авторының негізгі уәждерінің бірі – ата-аналарға түсетін қаржылық салмақ. Өтініште бастауыш сынып оқушысына қажетті мектеп киімдерінің толық жиынтығы отбасылық бюджетке елеулі шығын әкелетіні айтылады. Сондай-ақ мектеп формасы оқушылар арасындағы әлеуметтік айырмашылықты толық жоя алмайтыны және баланың өзін еркін сезінуіне кедергі келтіруі мүмкін деген пікір келтірілген.
Автор міндетті форманы түгел алып тастап, оның орнына іскерлік сипаттағы, бірақ ата-ананың қалтасына және баланың жайлылығына қарай таңдалатын киім үлгісіне көшуді ұсынады.
Петицияға қызығушылықтың қайта күшейгенін платформадағы соңғы белсенділіктен де байқауға болады. 1 қыркүйек таңертең сайтта бірнеше минуттың ішінде бірінен кейін бірі жаңа қолдаушылар пікір қалдырған. Олардың арасында мектеп формасын еркіндетуді қолдайтындар бар.
Дегенмен GosRating.com мемлекеттік петициялар порталы емес. Платформаның өзі тәуелсіз азаматтық жоба екенін және ондағы өтініштер мемлекеттік органдарға берілетін ресми өтініш болып саналмайтынын көрсеткен. Сондықтан 182 мыңнан астам қолды қоғамдық көңіл күйдің көрсеткіші ретінде қарастырған дұрыс.
Ал Қазақстанда мектеп формасына қатысты қолданыстағы талаптар әзірге өзгерген жоқ. 2026–2027 оқу жылында да мектеп формасы Білім және ғылым министрінің 2016 жылғы №26 бұйрығы бойынша міндетті болып қала береді. Ресми талаптарға сәйкес мектеп формасы күнделікті, мерекелік және спорттық болып бөлінеді.
Яғни петицияның қайта жандануына қарамастан, қазіргі таңда Қазақстанда міндетті мектеп формасын алып тастау жөнінде ресми шешім қабылданған жоқ.
