20 қыркүйекте Қазақстанның барлық 17 облысында, сондай-ақ Астана, Алматы және Шымкентте дауылды ескерту жарияланды. Синоптиктер найзағай, бұршақ, қатты жел мен тұман күтілетінін, ал бірқатар өңірде өрт қаупі жоғары екенін ескертті, деп жазады Democrat.kz.
«Қазгидромет» мәліметінше, елдің әр бөлігінде ауа райы жағдайы айтарлықтай ерекшеленеді.
Кей өңірлерде жаңбыр, найзағай және бұршақ болжанса, басқа облыстарда құрғақ әрі ыстық ауа райына байланысты жоғары немесе төтенше өрт қаупі сақталады.
Алматыда жел екпіні күшеюі мүмкін. Солтүстік өңірлердің кей бөлігінде түнде және таңертең тұман күтіледі.
Батыс және оңтүстік аймақтардың жекелеген аудандарында қатты жел болжанған.
Синоптиктер жүргізушілерге жолда сақ болуға, ал табиғатқа шығатын азаматтарға өрт қауіпсіздігі талаптарын қатаң сақтауға кеңес береді.
