"ҚазГидрометтің" хабарлауында еліміздің бірқатар өңірінде қатты аяз болып, кей жерлерде көк тайғақ күтілуде деп жазады Democrat.kz.
Еліміздің солтүстік өңірлерінде қыс қаһарына мінбек. Ақмола, Солтүстік Қазақстан және Қостанай облыстарында қар жауып, жаяу боран соғады деп болжануда:
Ақмола облысында желдің жылдамдығы 15-20 м/с дейін күшейіп, жаяу боран көріну деңгейін қиындатады.
СҚО және Қостанай облыстарында да түнде және күндіз қар жауып, бұрқасын күтіледі.
Павлодар облысының солтүстігінде де қар мен боран болуы мүмкін.
Шығыс өңірлерде аномальды суық әлі де сақталады. Сондай-ақ, кей аудандарда желдің екпіні қауіпті деңгейге жетеді:
Шығыс Қазақстан және Абай облыстарында түнде -40 градусқа дейін өте күшті аяз сақталады. Абай облысының Жарма ауданында желдің екпіні 25 м/с жетуі мүмкін.
Жетісу облысында түнде -25-27 градус суық болады, ал Алакөл маңында желдің жылдамдығы 28 м/с дейін күшейеді.
Елдің оңтүстік және батыс аймақтарында басты қауіп — көктайғақ пен көрінуді шектейтін тұман:
Шымкент пен Таразда күн райы құбылмалы болады: тұман түсіп, жолдарда көктайғақболады.
Түркістан, Жамбыл және Атырау облыстарында да тұман мен көктайғақ жүргізушілерге қиындық тудыруы мүмкін.
Манғыстау облысында түнде -22 градусқа дейін аяз болып, жел күшейеді.
