Қоғам белсендісі Төлжан Иманалы қазіргі қоғамның өзекті бір мәселесі туралы жазба жариялады деп жазады Democrat.kz.
"Тик-токта бір келіншек 50-ге толған тойын жасап жатыр. Ересек 3 баласы бар екен. Үлкен екеуі отбасылы. Кенжесі де есейген. Бұл балалардың әкесінің қайда екенін білмедім, бірақ қазір оған Түркияның бір азаматы ғашық болып, той үстінде сөз салды.
Келіншек басын изеп келісті. Ертең екеуі Түркияға ұшып кетеді екен. Келіншектің көзі бақыттан жайнап тұр. Қарап отырып мен де қатты қызықтым, шын жүрегіммен бақыт тіледім. Коменттерін оқиыншы деп кіре қалып едім, масқара, кілең қазақтың еркектері ауыздарына ақ ит кіріп, көк ит шығып, не сұмдықтың бәрін жазып тастапты.
Арасында байғұс әйелдер мен секілді бақыт тілеп жазыпты. Ішімнен біздің еркектерден шошыдым. Осы уақытқа дейін сол қазақтың біреуі алып, бақытты етсе қайда қалыпты?! Жоқ, біздің қоғамның қазіргі еркектері ажырасқан, не байы өлген қатынды әйел, ол да бақытты болуға лайықты деп санамайды. Менің соған зығырданым жаман қайнайды. Бізді тек пайдалану керек. Болды!
Басқаны қайтем, өзімді алайыншы мысалға. Мен де байы жоқ қатынмын ғой. Байым өлгелі 19 жылға аяқ басты. Маған жолыққан еркек мені тек пайдаланғысы келеді. Оған көнетін мен ба?! Мен ақша, көмек, қолдау сұрамауым керек.
Мен мүлдем үндемеуім керек. Бірақ менде бәрі болуы керек. Үй де, көлік те, ақша да болса, маған біреу-міреуі қарайды екенбіш. Егер түгім жоқ болса, мен ешқандай еркек қарамайтын сорлы бишара қатын болады екенмін.
Солайша менің қазіргі еркек-қатын боп кетуіме септігін тигізді бұлар. Яғни, сендер, Еркектер! Менің затым әйел ғой, нәзік болғым-ақ келеді. Бірақ оған мұрша бермейсіңдер ғой.
Қатындық болмысыммен өмір сүрсем, аш қалып, қоңыз теріп кетер ем. Сондықтан жеңді түре, балақты бүре, сендермен бірге теке-тірес еңбек етуіме тура келді. Жолда көлік жүргізгенімде де сол.
Кез-келген анша-мұнша шәлдіреңдеген еркегіңді шаң қаптырам. Оны мақтанып тұрып айта алам. Менің көлігіме отырып көрген осындағы достарым да куә оған. Жұмыс істеп, ақша табуым да біраз борбайы салаңдағандардан артық.
Ешкімге тәуелді емеспін. Мен өзімді ғана мысал етіп көрсеттім. Бірақ бірнеше миллиондаған әйел елімізде дәл мендей өмір сүріп жатыр. Соның бәрі сендердің, еркектер, қателіктерің. Сосын ай да кеп, “қазіргі қатындар құтырды, бұлар басқа шықты, бла-бла-бла” деп ренжисіңдер.
Өздерің құтырттыңдар. Өздерің боркемік болып, сасыдыңдар. Содан тіршілік үшін, ақша тауып, бала-шағаны бағу үшін, мына қасқыр заманның ағымынан қалып қалмай, ілесіп жүрейік деп біз білекті сыбана кірісіп кеттік.
Енді сол өздерің болмашы ғана әйел бақытын сыйлап, бақытты ете алмаған әйелді өзге ұлт өкілі бағалап, алақанына салып аялағысы келсе, махаббат пен бақыттың биік шегіне жеткізейін десе, іштерің күйіп, әшейінде адам ғұрлы көрмейтінің қызғанып, бүкіл нәжістеріңді төгесіңдер келіп.
Шынтуайтында бізге пішту. Не десеңдер де, боқтарыңды қалай пышақтасаңдар да өз бақытын тапқан әйел үшін басқалардың сөзі де, өзі де ештеңе емес. Өйткені, ол сол бақытқа жету үшін талай дүниені құрбандыққа шалды.
Қазіргі қоғамның 80% еркегі өткендегі маңқасы ағып, сұқбат берген еркектің ар жақ бер жағы. Бір қатынға ие бола алмай, қаншама еркек соның кебін киіп жүр. Ол сұқбатсыз-ақ, қай еркекпен сөйлеспесең де, қатынын жамандап отырады. Өтірік емес қой!
Айтарым көп еді, бірақ осымен әзірге тәмамдайын. Қазір шығады, “өзіңнің де аға-інілерің, ұлың бар шығар” дейтін маңқалар…"деп жазды Төлжан Иманалы.
