Белсенді ұстаз Сәния Нүсіпәлі соңғы уақытта қоғамда мұғалімдер арасында қызу талқыға түсіп жатқан "ҚМЖ дауына" қатысты өз пікірін білдірді деп жазады Democrat.kz.
Өзінің әлеуметтік желідегі парақшасында Сәния Нүсіпәлі "40 жыл бойы «қағазбастылықпен» айналысуды үлкен жетістік көру — бұл білім беру жүйесіндегі ескірген көзқарастың көрінісі" деп ҚМЖ толтыруды қолдап жатқандарды сын тезіне алды.
"Егер мұғалім тек дайын қалыпты толтырумен ғана шектелсе, оның шығармашылығы өледі. Сабақ тірі процесс болудың орнына, «кестені толтыру» рәсіміне айналады. 40 жыл бойы бір нәрсені қайталау — тәжірибе емес, бұл жай ғана дағды.
Қазіргі заман мұғаліміне шаблон емес, икемділік қажет. Оқушылар өзгерді, ақпарат алу жылдамдығы өзгерді. Демек, ҚМЖ (Қысқа мерзімді жоспар) мұғалімнің қолын байлайтын құжат. Оған бағыт беретін жеңіл конструктор болуы тиіс.
Формализм: Бізде әлі күнге дейін сабақтың қалай өткенінен қарағанда, оның қағазда қалай жазылғанына (үтір-нүктесіне дейін) көбірек мән беретін тексерушілер бар.
Қорқыныш: Жаңа форматқа көшу, еркін жоспарлау — жауапкершіліктен қорқатын адамдар үшін қиын.
Шаблонмен жүру оларға «қауіпсіз» көрінеді.
Нағыз ұстаздық — 40 жыл шаблон толтыру емес, 40 жыл бойы әр баланың жүрегіне жол табатын жаңа әдіс іздеу. Қағаз ешқашан тірі сабақты алмастыра алмайды", дейді Сәния Нүсіпәлі.
